Kelkang mite tana Sorkarin Special Assistance pe tura a thurel bawhzuiin vawiin khan Home Minister Pu R. Lalzirliana chuan Kelkangah he hmalakna kalpui dan tur leh mipui lam inpuahchahna hrang hrangte sawiho a ni a. He hunah hian Champhai DC Pu H. Lalengmawia leh he hmalakna in a kaihhnawih department hrang hrang hotute leh Kelkang khawtlang hruaitute an tel a.

 Home Minister chuan Kelkang chu Mizoram pum tan hmun pawimawh ah a chang tawh a ni tiin, a khaw mipuite leh pantuten an mamawhte chu Sorkarin phuhruk turin a inhuam zau thu a sawi a. Tuna Special Assistance pek tur pawh hi chak taka kalpui a nih a, sorkar lam atanga hna kalpui tur department lam leh khawtlang hruaitute chuan thawhhona tha tak an neih a pawimawh thu tarlangin, he special assistance hi July 2015 chhung chuan peih fel vek tura a beisei thu a sawi a ni.

 Champhai DC Pu H. Lalengmawia chuan ar leh vawk sem tur chu sum lu tura ruahman a nih thu leh, vulh len a hralh zawh vek tur a nih loh thu mipuite hrilhhre turin khawtlang hruaitute chu a chah a. Hmalakna mawhphurtu department te cu hna bik hrang hrang thawk, mahse thawhho ngai tak si a nih dawn avangin inrawn that a ngaih tur thu a sawi bawk.

 Kelkangah hian chhungkua (household) 237 awm anga chhinchhiah niin, in tinah hian tui khawlna tur tuizem litre 2000 dawng naktuk atang hian sem tan tura ruahman a ni a. Chhungkaw 13 hnenah ar 50 theuh, chhungkaw 216 hnenah vawk 2 pek a ni dawn bawk a. Tunah hian vawk in tur hi 70% bawr chu sak zawh tawh niin, ran in chung tur hi rangva tumsak an ni dawn bawk a. Swacch Bharat hmalakna hnuaiah inthiarna tur unit 200 rangva a siam tura ruahman a ni bawk.

 Dilkawn leh Kelkang khua in tui thianghlim an tlan dun theih turin Dilkawn khaw bula tui hna awm chu awlsam zawka panna turin kawng metre 1.5 siam tura ruahman a ni bawk a. Eng (electricity) tha zawk neih theih nan a hmalakna zingah Kelkang khaw chhunga hmun laili leh pawimawhah electric ban phun belh tum a ni bawk.

 Home Minister hi nimin khan Khawbungah Education Awareness Campaign a hmanpui hnu in Hla Kungpui Mual Committee te nen inkawmin, he hmun tihchangtlun nana hmalak dan tur a sawipui a ni.