Mizoram Youth Commission leh Sub-Headquarters YMA, Serchhip tangkawp buatsaih thlakhat awh Mobile Vocational Training kharna inkhawm vawiin chhun dar 12:00 khan Serchhip DC Conference Hall-ah neih a ni a, Chief Minister Pu Lal Thanhawla chuan khuallian niin he hun hi a hman pui.

 Pu Lal Thanhawla chuan thalaite tana khawvel thar siam chu Sawrkar an siam hma atanga an intiamna anih thu leh an tiam ang ngeia hma an lak thu sawiin Sports leh thil hrang hrangah hmasawnna pawh hmuh tur a awm mek a ni a ti a, thalaite hamthatna tur kawng dap tur bik Mizoram Youth Commission pawh mumal taka din anih thu leh an thawhrimna rah thalai ten an seng mek a ni a ti a, abikin skill development lamah tan nasa taka lak anih thu leh mimal tinin kan mamawh rualin hnam ang pawn kan mamawh hle a ni a ti a, mimal tin thawh chi leh thawh thiam zawng haichhuak turin theihtawp Sawrkarin a chhuah a, lehkhathiam te tan pawh Central Service a a tam zawk an luh theih nan IAS Coaching Centre rin tlak leh belhchiandawl chah luh anih theih nan kawng dap mek anih thu a sawi bawk. Sawrkar Laipui pawhin Skill Development a ngaihpawimawh thu leh Ministry hran hial a din thar phah thu sawiin Chief Minister chuan kaihruaitu leh zirtirtu tha an awm phawt chuan Mizo thalaite hi thil thiam chak tak leh thiam thil ngah tak an nih avangin zirtir an nuam bik a ni a ti a, Mizoram Youth Commission in Skill Development Training a buatsaih thin zarah thalai tam takin eizawnna nghet an neih phah tawh a, hmun hran hranah hetiang training hi buatsaih anih zel dawn avangin thalaite pawhin an ngaihven a phur taka an lo dawnsawn thin a pawimawh hle a ni a ti bawk. Mizoram Youth Commission kaltlangin Mizo thalai engemawzat phaiah training tir an nih thu leh hna tha tak tak an hmuh thu te, hna zawn lamah harsatna an neih loh thu te Chief Minister hian a sawi bawk a ni.

 Thusawitu dang Pu T. Sangkunga, MLA, Chairman, Mizoram Youth Commission chuan mizo thalaite zingah hna thiam bik nei (skilled labour) kan tlem avangin skilled development training hi uar lehzuala kalpui a ngai a nia ti a, Chief Minister-in thahnem a ngaih pui zarah leh thalaite hmakhaw ngaih vangin hetiang programme hi harsa tak chungin buatsaih zel a ni a, Aizawla MYC Office buildingah pawh Training Centre tha tak siam turin hma lak mek a ni a ti bawk. MYC hmalakna in Mizoram pawnah thalai training tur 1280 thawn an nih tawh thu leh an zinga 630 chuan training zo tawh a hna tha tak an hmuh tawh thu a sawi a, thalai tam zawk thawn chhuah an nih zel theih nan hma lak anih reng thu a sawi bawk.

Mobile Vocational Training hi May ni 19, 2015 atanga neih tan kha niin Serchhip District chhung khaw hrang hrang atang mi 90 in Trade hrang hrang paruk – Cement Mistiri, Beauty & Hairing, Cutting & tailoring, Electric Wiring, Mobile Phone Repairing leh Two-Wheeler Repairing ah te Training that akin an zo a, heng training chhuakte hi Chief Minister in Training Completion Certificate a hlan a ni.

 Vawiin Training khar inkhawm hi Pu RL Chhuanawma, President, Sub-Headquarters YMA, Serchhip-in a kaihruai a, Pu C Lalhminghlua, Education&Youth Affairs Sub-Committee Chairman leh Pu Lalsawmzuala, Superintendent, MYC ten report pe in Trainee ten an thil zir atanga hlawkna an chhar te mipuite hnena sawichhuahna hun an hmang bawk a ni.