Association of Indian Universities East Zone Vice Chancellors Meet 2009 Berawtlang, Aizawla neih mek chu Chief Minister Pu Lal Thanhawla’n vawiin zing khan a hmanpui.

 

 

Chief Minister chuan mithiam chungchuang rual intawhkhawmnaa thusawi chu a insit deuh thu a sawi a. Zirna hi khawtlang leh nitin eizawnna lam ti hmasawntu atana tul pawimawh a ni a, chuvangin mihringte hmantlaka chherchhuah hi investment pawimawh tak a ni, a ti a. Tunhma lam khan ngaihven a hlawh tawk thin lova, tunhnai atang khan ngaih pawimawhah kan nei ta a; a lawmawm hle a ni a ti. India President lo ni tawh leh mi ril, Dr. S. Radhakrishnan khan ‘engangzia khawtlang nge din kan duh tih ngaihtuah chunga zirna hi kalpui tur a ni’ tia alo sawi thin khan zirna awmzia a sawifiah hle a a hriatthu a sawi a. Tuna kan zirna kalphumg, British hovina min hnutchhiah hian kan khawtlang nunzia dik tak nen a inrem lo deuha a hriatthu sawiin, Pu Lal Thanhawla chuan kan khawtlang mamawh chu thalaite hmantlaka siam leh thil inthlakthleng lo hmachhawn thei tur a chher a ni a. Amaherawhchu, chutiang hmachhawn thei tur chuan an thiamna in a phalo mai nilovin, kan zirna kalphung hrim hrim hian zirlaite talent hi a phawrh chhuak zo lo ni ber hian a hriat a ni a ti. Chuvangin, kan zirna kalphung hi mumal taka thlak danglam a hun tawh a, kan thalaite hi ziak leh chhiar thiam tir mai duh tawk lovin, thiamna tluantling (educated) an nei tur a ni a ti.

Chief Minister chuan zirna sang zawk thanbelh tir zel a, quality humhalh tlat tih thu an sawiho tur chu inhmeh a tiin, rampum tan leh democratic planning atan a pawimawh a ni a ti a. Quality humhalh chunga zirna tih zauh belh chu kan tum ber tur a ni a ti. Higher Secondary level atanga tih zauh belh zel chu kum lokal leh zel urah a hautak chho hle dawn a, a chhan chu SSA hmalakna hian elementary level ah nasa takin hma alo zauh tawh si a. 11 th Plan ah hemi level a gross enrolment chu 85% ni tura chhut a ni a ti. Tin, Sakshar Bharat (Literate India), tunhnai maia bul tan hian gross enrolment level hi mataduai 70 in a pun chhoh beisei a ni bawk a. Chuvangin, zirna lama kan mamawh hrang hrang te hi a taka kan chhut chhuah thuai hi a tul hle a ni a ti. Hei hi India Hmarchhak States te tan a pawimawh bik a ni a tiin, physical infrastructure lamah phei chuan pachhe tak vek kan ni a ti a. Hei hi sorkar mai nilo, academic community te pawhin an ngaihtuah ran a tul thu a sawi a ni.

A sawi belh zel naah, Pu Hawla chuan zirna tha tluantling hi a bul, Elementary atanga University thleng kan ngaituah a tul thu sawiin, a kar laka improvement siam tum hian rah tha a chhuah zo thin lova a hriat thu a sawi a. Chuvangin, a bul thuta zirtirna tha, zirtirna hmanrua leh zir tur te a pawimawh a tih thu a sawi a. Hmarchhak states ah te hian trained teacher leh zirlai naupang te proportion zat hi a chhiat hle thu sawiin, national average aia a tlem fal zia a sawi a. Hetiang kan nih avang hian zirna quality hi a tha mawh hle a ni a ti. Hmarchhaka Higher Secondary schools in Laboratory leh tul dang mamawh an neih te chu 16% atanga 41% te a nih thu a tarlang a. Hetiang dinhmuna ding kan nih avang hian zirna lama kan hniam bik pawh hi thil mak a ni hranpa lo a ni Chief Minister chuan a ti. India sorkarin National Commission For Higher Education and Research a din hian beiseina lian tak a neih thu a sawi bawk a ni.

Chief Minister chuan heng harsatna kan neihte ngaihtuah tura NEC in North Eastern Regional Education Council a din chu lawmawm a tih thu a sawi a. Kalkhawmte chu mihringa a tha ber lai chherchhuak tura hmathlir sawiho tur an ni chu lawmawm atih thu a sawi a. An sawiho tur te hlawhtling taka an neih theih ngei nan duhsakna a hlan a ni.