Mizoram Power & Electricity department leh National Productivity Council (NPC), Regional Office, Kolkata tangkawp ina ahuaihawt, ‘Training on Energy Conservation for Various Stakeholders’, Electric power hmangtute tana hman renchem training tih chu vawiin khan Chief Minister Pu Lal Thanhawla chuan Aijal Club ah a hawng.

Hawnna thuchah a sawiah Chief Minister chuan electric power hi kan thawhchhuah aia tam tak kan mamawh avangin a hman renchem hi a tul tak zet a ni a ti a. Renchem loh vanga sorkarin sum tak kan chawi thinte hi mipuiin kan hriat a, renchem pawimawhna inzirtir hi thil tul tak a ni a ti. Hemi lama hma la turin kalkhawm mithiamrual te chu chahin, mipui lam pawhin an ngaithla ngei ang tih a sawi a. Power kan mamawhna te hi nizung chakna hmangin min phuhruk thei ang em tihte hi zirchian a tha hle a ni a ti a. Trainingna hian power hmangtute lam, demand side management lam hawi anih dawn avangin uluk taka zirchianga, mipuite la zirtir leh nise tih a duhthu a sawi bawk a ni. Hengte bakah hian Chief Minister chuan sorkar building sak reng rengah power hmang tlem thei ber tur ang zawnga sak anih theih nan Engineer te, Architech te, Administrators leh Aizawl Development Authority lamte pawhin enpui a, Energy Conservation Building Codes hi hrechiang hle se a duhthu a sawi bawk a ni.

Chief Minister chuan Power lama kan hnianghnar theih nan kan lui neih zawng zawngte hi power siamchhuah nana khuah vek tum a nih thu sawiin, heng atangte hian 4500 MW a siam chhuak thei dawn a ni, a ti. Mizoram chhunga hmasawnna hrang hrang thawh mek, border trade, hydel project leh Bay of Bengal pawhna tura Myanmar lawng chawlhhmun Kalewa thleng leh Lawngtlai atanga motor kawngpui siam hna kalpui mek a hmuna rawn enfiah tura India Foreign Secretary hova Inter-Ministerial Team lokal tur thu pawh a sawi lang bawk a ni.

Hawnna inkhawm hi Pu C.L.Thangliana, Engineer-in-Chief, P&E in a kaihruai a. Mithiam sawmbik, NPC, Kolkata atanga lokal, A.K.Sinha, Regional Director, leh Dr. S. Biswas, Director ten thu an sawi bawk a ni. Training a tel te hi Power Department, Zoram Energy Development Agency leh Joint Electricity Regulatory Commission atangin Engineer te, PWD, Mizoram Architech Forum leh ADA atangin architech te an ni a. Hun hnihna ah power presentation hmangin NPC in thupui hrang hrang 4 ah zirtirna a pe bawk a ni.