October ni 2, 2014 a India Hnam Pa Mahatma Gandhi piancham denchhena Faina Hapta Mizorama hman tan chu vawiin khan Aizawl Municipal Council ina a kharna inkhawm Vanapa Hall-a a buatsaihah Chief Minister Pu Lal Thanhawla chuan a khar ta.

Kharna inkhawma thusawiah Chief Minister chuan faina hapta programme chu khar a ni a, faina erawh tawp chin awm loin hma lak chhunzawm zel tur a ni a ti a. Faina Hapta chhunga kan hmalakna thinah thing leh maute kan suat mai thin a, hei hi a pawi hle a ni tiin, thing leh mau, hnimhnahte hi kan chenna boruak tha min siam saktu an ni a, kan humhalh fo zawk a pawimawh a ni tih mitinin i hre thar ang u a ti a. Hriselna bul pawimawh tak chu faina a ni tiin, Pu Hawla chuan khawtinah vantlang inthiarna, a hranga mipa leh hmeichhe te hman tur siam a tul thu a sawi a. Hei hi bialtu MLA Local Development Fund atanga hmalaka siam theih a ni a ti.

Chief Minister chuan faina hi Prime Minister Narendra Modi pawhin ngaipawimawhin ram puma tih turin faina beihpui “Swachch Bharat Abhiyan” a thlak thu a sawi a. He campaign hi Faina Hapta hawn ni khan hawn a nih thu a sawilang bawk a ni. Faina hi Pathian kan an teuhna ber a ni kan ti thin a, chuvangin fai hi mitinin ngaipawimawhin kan mawhphurhna theuh a ni tih i hre thar ang u tiin Chief Minister chuan mipuite a sawm a. A hapta khar nimahse, faina chu tiam chin awm loin i kalpui zel ang u a ti.

Faina hapta hman chhung hian AMC chuan a huam chhunga Local Council 82 te hnenah faina programme an kalpuina tur Rs.3000/- a pe a ni.

Faina Hapta hman chhung hian AMC chuan tehfung hrang hrang hmangin Veng, College, Hospital & Nursing Home, Daily Newspaper leh Photography ah te faina lawmman a siam a. Lawmman hi pathumna thleng siamin pawisa fai leh certificate a keng tel vek a.

Veng fai bera thlan Republic Vengthlang chuan pawisa fai Rs. 30,000/- leh certificate an dawng a, pahnihna (veng 2) in Rs.20,000/- leh pathumna (veng 3) in Rs.10,000/- an dawng a. College category ah Govt Aizawl College chu pakhatna niin, Rs. 10,000/-, pahnihna Institute of Advance Studies in Education niin, Rs. 7,500/- an dawng a, pathumna Govt. Zirtiri Residential Science College in Rs.5,000/- an dawng bawk a.

Hospital fai ber Synod Hospital in Rs.10,000/-, pahnihna New Life leh B.N. Hospital ten Rs.7,500/- leh pathumna Civil leh Greenwood Hospital ten Rs.5,000/- an dawng bawk a.

Daily Newspaper category ah faina lam hawi ziak tha berah Zawlbuk thlan a ni a, Rs.7,000/-, pahnihna Tawrhbawm Rs.5,000/- leh pathumna Romei Rs.3,000/- an dawng bawk a.

Photography(Thlalak) a faina pholang tha ber in Rs.5,000/-, pahnihna Rs.3,000/- leh pathumna Rs.2,000/- te an dawng bawk a ni.