Chief Minister Pu Lal Thanhawla chuan vawiin khan AMFU Durtlang Branch buatsaih, Farmers Meet cum NLUP Awareness Campaign, Durtlang MultiPurpose Community Halla neih chu Khuallian niin a hmanpui.

Chief Minister chuan kuthnathawh hi khawvela hna zahawm berte zing ami a ni a, kan thalai lehkhathiam inti, competitive exam a tlingzo silo ten hna hmusitawma an en ta mai hi pawi a tihthu a sawi a.Tuna sorkar flagship programme NLUP hnuaia hna thlan tur chhawpchhuahte hi tih puitlin theih tur leh sum pawh in a daih tur te chauh thlan a ni a ti a. Central sorkar pawhin khawtlang leh ram economic dinhmun tidanglam dawr'h thei a ni tih an hmuh avangin rampuma hman ve an duh a. Hetiang anih tak avang hian tha zawk tura an ngaih angin an her danglam a, chuvangin kan duhdan ang leh tum angin kan kalpui thei ta lo a ni a ti. Sum lamah pawh kan mamawh zat tur awma kan hriat cheng vaibelchhe 2500 chu cheng vaibelchhe 2970 ah ruahmanna an siam bawk a ni a ti. Kan beisei aia tama min tuam an tum avangin kan tih ve tur chu taimakna, rinawmna, dikna leh tumruhna te a ni a ti.

Pu Lal  Thanhawla chuan mipui lam inpeih hun ah  NLUP chu kalpui a ni ang tiin, tunah rih chuan a dawng turte rilru leh an dawnthleng ala sawih em avangin ala kalpui theih loh a ni a ti a. A dawng tur te rilru leh dawnsawn tum dan kha siamrem hmasak phawt a tul a ni a ti. Hmanhmawh taka sema hlawhchham ai chuan muangchanga kalpuia hlawtlin kan tum zawk a ni a ti a. He programme hi kan programme a ni a, midang rawn inrawlhna chi a nilo a ti. Tuna baseline survey-a alan dan chuan ar leh vawk vulh duh an tam ber a, eizawn nana hna ngelnghet tling khawp tur Ar Farm emaw Vawk Farm siam emaw te chu thlang nise tanpuina kan pe nghal ang tiin, ar leh vawk vulh an tum dan erawh chu mahni in compound chhung zimteah a ni a. Chutiang chuan tuchhuan thleng phak eizawnna ngelnghet a siam dawn loh avangin a pumpuia zirchian leha uluk tak leh fimkhur taka kal chhohpui a tul a, a hlawhtlin ngei ngeina tur kan en mek zel a ni a ti.

AMFU President Pu R.Lalduhawma pawhin thusawiin, NLUP hi tlangram lo neih bansanna tur programme anih thu a sawi a, chutih rualin mirethei kuthnathawktute ten leirem an rah ve na tura, a khaichhuahna tur rahbi lo tuksakna a nih avangin AMFU chuan a phurpui takzet a ni a ti a. NLUP hi a hlawhtling lo anih chuan Mizote tan inkhaichhuahna tur dang a vang tawh hle ang a ti. Chuvangin a hlawhtlin ngei ngeina turin a dawng tur ten kan dawn dan turah rilru lo siam a, tumruhna, taimakna  leh rinawmna nen i kalpui ang u tiin mipuite chu a sawm a ni.

Hemi huna khualzahawm Bialtu MLA Pu R.Romawia, Speaker, Mizoram Legislative Assembly pawhin thusawina hun a hmang bawk.

Campaign hi AMFU Durtlang Branch Senior Adviser, Pu R.Laltluanga'n a kaihruai a ni.

Attachment

  • Loading attachment...