Mizoram Football Association (MFA) hmalakna a FIFA leh All India Football Federation (AIFF) in footbal zirtirna lama India a a hmasa ber tur, FIFA Grassroots Course, ni 5 chhung awh tur chu tukin khan Chief Minister Pu Lal Thanhawla chuan I&PR Auditoriumah a hawng.

Chief Minister chuan football zirna lama trainingna tur MFA hmalakna chu fakawm tiin a ropui hle a ni a ti a. Kum 2008 inthlan dawna mipuite hnena an lo tiam tawh, thalaite tana khawvel thar siam tihlawhtling chhotu a ni a ti a. Sports Minister hmalaknain kan thalai ten sports lamah nasa takin an thang a ni a ti a. FIFA leh AIFF in Mizo thalaite talent cho chhuah tur tam tak an rawn hmu hi a lawmawm hle a ni tiin, vawiin ni hi kan sports history ah a chuang reng tawh dawn a ni a ti.

Chief Minister chuan BCCI in Cricket Association of Mizoram pawh Cricketa thuneitu sang BCCI in a rawn pawm tawh thu a sawilang a. Mizo thalaite chu contact sports lamah te pawh ram chhung leh khawvel levela chawimawina an dawn tawh thin thute a sawi bawk a. Mahniin tumruhna kan neiha, infiamna tul pawimawhte pek kan nih bawk chuan sang takah kan invawrh thei a ni a ti a. Chuvangin theihtawp kan chhuah tlan a, sports administratorte pawh entawntlaka kan awm chuan khawvelah a ber kan nih theih lohna a awmlo a ni a ti.

MFA President Pu Lalthanzara, Parliamentary Secretary chuan India a hmasa ber ni tura FIFA in he khawvel zau taka hetiang course kalpui tura min thlang hi talent kan nei tih a chiang a ni a ti a. Chief Minister hmalakna in turf khelmual 3 kan neih phah thu a sawi bawk.

FIFA aiawh, tuna AIFF a Coaching Departmenta a hotu ber ni bawk, Scott O’Donell chuan football hi hlawhtling taka kalpui chho tur chuan a bulthut, grassroots programme hi a pawimawh hmasa a ni a ti a.Khaihlak awm lova hetiang programme hi kalpui in duh a ni tih pawh kan hria a, Chief Minister atanga in tui avang pawh hian a phur awm hle a ni a ti a. Grassroots hi hmeichhia leh mipa naupang kum 6 leh kum 12 inkar ami te an ni a. Heng naupangte zirtir tur hian a zirtirtu tur te hnenah grassroots course training, theory leh practicalin zirtirna kar khat chhung ( 15th - 19th Oct 2012) mipa 26 leh hmeichhia 2 te hnenah pek an ni ang a ti a. Heng grassroots course zir zo te hian an khua theuha an kir leh hunah naupangte hnenah, an school zirlai tibuai lovin zirtirna an pe thin dawn a ni a ti. India in kum 2017 khian FIFA Football under 17 a thlen dawn avangin hetiang training course hi a pawimawh hle dawn a ni a ti..

Naupang kum 6 leh 12 inkar te hnena football zirtirna petu tur, FIFA Grassroots Course training zo te hian Rajiv Gandhi Stadiumah naupang 500 rual, kum 6-8 inkar, kum 9-10 leh kum 11 - 12 inkar angtea thliar hrangin thla 3 chhung coaching an neihpui ang a. Naupangte hian Rs.1000/- theuh an chawi ve angai dawn a ni. Infiamna ‘kit’ kimchang FIFA in a tum sak vek thung ang. Heng naupang 500 rualte atang hian an thiam dan azirin chhawng 4 thlenga thendarh an ni ang.

Scott O’Donell hi FIFA Grassroots Course Programme Development Manager Suvrat Thatte in a rawn tawiawm a ni.