Kar kalta October ni 11-a Dapchhuah bula leimin thian faitu JCB chetsual-a a Operator, Handyman leh Kawrthah Sumo driver te thih chungchangah bialtu MLA, Pu John Rotluangliana, Dy. Speaker, Mizoram legislative Assembly chuan pawi a tih thu leh chhiat tawk chhungte a tawrhpui thu a sawi a. Deputy Speaker hian chhiat tawhna hmun ngeia kal ve pawh a duh em em rualin pumpelh theih loh pawimawh dang avagin a kal ve thei lo pawi a tih thu leh tlawmngaia ruang zawng tura khaw hrang hrang atanga thawk chhuak te, sorkar department hrang hrang leh a hmuna thutchilh rengtu police-te chungah bialtu MLA a nih angin lawmthu a sawi bawk a ni. Amah a remchan loh avang hian Deputy Speaker hian October ni 12 (Zirtawpni) khan a Private Secretary chu Dapchhuah-ah hian a tir a, ruang zawngtute tanpui nan Rs.10,000/- a pek tir nghe nghe a, hei hi Dapchhuah YMA hruaitute kutah hlan a ni.

Deputy Speaker hi Zirtawp zing khan a Personal Branch-a thawk chhiat tawk an awm a, chhunah Work Coordination Committee-ah a tel a ngai a, a tuk Inrinni khan a bial chhung Lengpui-a Central Human Resources Development Minister-in NIT lungphum a phumnaah a tel leh a, nimin Pathianni khan a fanu dam loh avangin Delhi-ah a thlawk thla leh nghal a, tunah a cham mek a ni. Deputy Speaker hi a lo haw hun tur sawi theih a la ni lova, heti chung hian ralkhat atang pawhin ruang zawn hna kal mek chu Pu John Rotluangliana hian a ngaichang reng a ni.