Chief Minister Pu Lal Thanhawla chuan vawiin khan Legislative Assembly Annexe Conference Hall-ah ni sarih, 21 - 27 February 2014 chhung awh tur Mizoram pum huap Fire Prevention Week a hawng. Thupuiah ‘Kangmei tichhuaktu nilovin a vengtu nih i tum ang u’ hman a ni.

Chief Minister chuan Mizoram hi ram mawi tak, hnim hring, thing leh mau ramngaw tamna leh nungchate zalenna ram ni thin, kan pipute pawh in a humhalh nachang an hriat thin kha tunah chuan kan ramngawte kan tihchereu nasat lutuk avang leh chungleng savate leh tuia sangha leh nungcha dangte tur hial hmang duh khawpa kan suat thin avangin chenna tlak loh thlaler ramro ah a chang mai ang tih a hlauhawm a ni a ti a.Kan ram hi ram hring tha tak angin lang mahse ramngaw tak tak chu tlemte chauh a ni a ti a. Kan ram neih chhun hi tumahin min rawn humhalh sak dawn lo a, chuvangin a neitu vek kan ni tih kan hriat a, duat taka enkawl a humhalh tlat hi mitinin kan tih tur a ni a ti. Ringtu kan nih angin Pathian thil siam zawng zawng hnenah chanchintha kan hril tur a ni a, mihringte chungah chauhlo, kan chhehvel boruak, thing leh mau, ramngaw leh leichung leh tui chhunga cheng nungcha te hnenah chanchintha hril hi kan tih tur pawimawh tak a ni a ti. Chuvangin khawih ah pawh hnathawkin awm ila rinawmna, dikna leh Pathian tihna nung nen kan thawh chuan chhe tawh leh chhe mekte siam thatu kan ni thei a ni a ti.

Mizoram hi khawvel hriata ber kan nihna pahnih, cancer vei tamna ber leh ram tikang nasa ber kan ni hi a chhuanawmlo tak zet a, chuvangin a chhelai siam thatu nih kan tum vek tur a ni Chief Minister chuan a ti a. Ram kang venna kawnga pawimawh tak pakhat chu VC tin ten an huam chhunga lo, huan leh nul nei zawng zawngte chiang tak leh felfai taka chhinchhiah a ni a, hemi kalpui tur hian VC zawng zawngte chu khauh taka hriattirna pek an nih tawh thu Chief Minister hian a sawi a.Ram tikang tu chu Forest official te leh police te kutah hrem theihna sorkarin a pek tawh thu a sawilang bawk a. Lo hal hun chhung sorkarin a siam zawmlo khua nikum chhung khan khaw 19 chiah an awmthu a sawi bawk.

Chief Minister chuan kan ram hi kan ta a ni a, a chhiat leh that ah mawh kan phur vek a, a neitu vek kan nih angin a veng himtu vek kan ni tih kan hriat reng a tul tak meuh a ni a ti.

Hawnna inkhawm kaihruaitu Pu J.L.Singh, PCCF & Principal Secretary to GOM and Member Secretary, SLFPC chuan state danga alo awm tawhna nen kahikhinin Mizoram sorkar chu kangmei chhuak thei laka invennaa hma la nasa bere nia a hriat thu sawiin, state dangte tan a entawntlak hle a ni a ti.

Pu Lalthangliana Murray, SLFPC sub committee member secretary in Mizorama kangmei chhuak chungchang powerpoint hmanga a hrilhfiahnaah Mizoram chu forest cover nei tha ber mahse, ngaw tak tak chu 1% vel chauh ani a ti a. Environment humhalh leh siam hi India Danpuiin mitin a phut thu a tarlang a. Mizoram ram kangmei nasat dan chu kum 1995 atang 2010 thleng khan hectare 3000 atangin 31118 hectare anih thu a sawi a. Kum 2010-11 atang chuan sorkar hmalakna avangin hmun 69ah hectare 1349 a zau kangin, kum 2013-14 ah hmun 9 ah hectare 379 a zau chauh a kang a ni a ti. Ram kang tur ven nana hmalakna tha chu meikawng sial, lo vah a ler atanga hal tan - meilukhai siam, kawngpui sira sikret nung paih loh leh kangmei thelhtu nih vek tum te a pawimawh thu a tarlang bawk.

Kum 2013-2014 chhunga kangmei chhuak thei venna kawnga hmala tha, district leh village level anga lawmman late hnenah Chief Minister hian a sem bawk a. District levela ti thate pathumte lawmman chu 1-na Lunglei District Rs.20,000/- leh certificate, 2nd-na Kolasib District Rs.15,000/-leh certificate leh 3rd-na Aizawl leh Serchhip dist.Rs.10,000/- leh certificate ve ve leh district tin chhunga khaw 3 titha te hnenah Rs.10,000/-, Rs.7,000/- leh 5,000/- leh certificate theuh te hnenah hlan a ni bawk.