226/2023-2024

Aizawl, 26.04.2023: Mizoram sawrkar hnathawktu intelkawmna pawl lian ber Federation of Mizoram Government Employees & Workers (FMGE&W) General Conference vawi 32-na chu vawiin khan Vanapa Hall ah neih a ni a. Chief Minister Pu Zoramthanga chu he hunah hian khuallian niin a hmanpui.

Chief Minister chuan thu sawiin, an FMGE&W in an thurel tur zinga sawrkar sum sen tih tlem nan sawrkar hnathawk nghet Pay Level 6 leh a chunglam te tan sawrkarin ration buhfai subsidise (tih tlem) a pek chu tihtawp ni se - tia an chhawpchhuah chu fakawm a tih thu a sawi a. Mahni hlawkna tur chauh nilova zavai dinhmun thlir chunga in hrek zawnga ngaihtuahna a awm chu lawmawm a tih thu a sawi a ni. Chief Minister chuan sawrkar hnathawkte hamthatna tur ngaihtuah leh an thil mamawh hrang hrangte nawr tura inkhaikhawmna fel tak insiam a hma latu hruaitute an awm chu tangkai a tihpui thu a sawi a. Hripui leng avanga India ram pum sum dinhmun in a tawrh dan leh sawrkar laipui atanga kan sum hmuh tur- kan sum hman tur pawh a lo innghah vek tawhna chu kan hmuh theih tak loh thu leh, chu sum chu a hnu ah rulh a nih tak bawk si loh avanga vawiin ni thlenga sum harsatna a la awm tak zel thu a sawifiah a. Sawrkar laipuiah pawh he harsatna hi sukiang tura hmalak mek zel a nih thu a sawi.

Chief Minister chuan sawrkarna fawng vuantu thlan tlinte chu inthlak fo an nih avangin ram tan hmalakna tur hrang hrang tha tak tak ruahman thin ni mahse a hlawhtlinna tluantling chu sawrkar hnathawk nghet te chungah thui tak a innghah thu a sawi a. Mipui hamthatna tur ruahmanna hrnag hrangte chu a rah tha lang tur chuan kum tam tak nghah ngai te a awm thin avangin, chu rah duhawm chu a lan chhuah ngei theih nan sawrkar hnathawkte an pawimawh thu a sawi. Chief Minister chuan pawl anga hmalaknate pawh hmathlir thui tak nei chunga kalpui ni se tiin, ruahmanna a felloh chuan vawiin ami te'n tuar lo mah ila kan tu leh fa te tan tuarna a thlen theih avangin fimkhur a pawimawh thu a sawi bawk. Chief Minister chuan Mizoram chu economy hmasawnna kawngah state entawntlak ni thei tura potential tha tak a neih te chu hre reng chungin, sawrkar hnathawkte pawh an ngaihtuahna chutiang zawk chuan siam danglam a tlachawp a kal mia nilovin, hmathlir thui tak leh tha tak neiin theihtawp chhuah turin a chah bawk a ni.

FMGE&W khawmpui hun khatna Chief Minister hova hmanah hian an president Pu Lalchuailova pawhin thu sawiin, pawl din chhoh dan leh hmalakna tlangpui a sawi a. Programme hi Sr. Vice President Pu R. Lalrammawia chuan kaihruaiin Secretary General Pu J. Ramdinmawia hnen atangin report ngaihthlak a ni a, Vice President Pu C. Lalrosanga chuan lawmthu sawiin hun a khar a. Hemi zawh hian inthlanna neih a ni a. Chawhnu lamah rorel neih chhunzawm a ni.

FMGE&W hi November ni 24, 1973 khan din niin sawrkar hnathawkte hamthatna turin kawng hrang hrangin hma an la thin a. Covid-19 hripui len lai khan hripui dona leh puih ngaite tanpui nan Chief Minister's Covid-19 Relief Fund ah Rs. 5,82,31,200 an chhunglut a ni.

Vawiina FMGE&W chuan 2023 - 25 chhung atana an hruaitu tur an thlanchhuah te chu hengte hi an ni:

1. R.Lalrammawia, Transport Deptt.
2. J.Ramdinmawia, Eco & Stat. Deptt.
3. Lalchuailova, Art & Culture
4. C.Lalrosanga, Secretariat
5. Hmingchungnunga, Education
6. Laltleipuii, Fisheries
7. Daphne Zosangpuii, ATI
8. Albert Lalbiakmawia, Police
9. Lalremsanga Khiangte, Home
10. Dr.Lalringmaia, Health

Inthlan hi MJA Gen. Hqrs., chuan a buaipui a. Heng an mi thlante hi chanvo an insiam rem leh dawn a ni.