225/2023-2024

Lunglei 26th April, 2023 : Vawiin khan Jaal Jeevan Mission hnuaia cheng nuai 89, sing 9, sang 9 leh za 800 senga siam Upper Lungrang leh Lungrang S khawtlang tui thianghlim chawm tu tur Solar Water Pump chu Lunglei South bialtu MLA Dr.K.Pachhunga chuan a hawng.

Dr.K.Pachhunga chuan mipuite tana PHE Dept hnathawh chu ropui a tih thu sawiin a sur a sa hnuai a Department thawktu ten an beihna chu Lungrang khawtlangin chhawr tangkaiin tui thianghlim hniang hnar an nei thei dawn ta chu hmasawnna ropui tak a ni tiin Mizoram sawrkarin a hmalakna zarah JJM Pilot project ah thun a ni chu lawmawm a tih thu a sawi a ni.

Sr. EE. Er.Pu Laltlanchhunga'n technical report a peka tarlan a nih danin he ni zung chakna hmanga tui pump-na hna hi January 2022 ah tan niin April 2023 ah zawh a ni a, mihring 1276 atanga hman tan tura chhut niin, mihring punna ngaihtuaha kum 2051 thleng mihring 1684 ten tui thianghlim hnianghnar tak a chawm tura duan a ni. In tinin inchhunga tui an herh haw theih turin Connection 384 pek a ni. He hmalakna hi thingtlang khaw hrang hrang ten an hman theih tura hmalak niin Upper Lungrang leh South Lungrang te intawm tura duan a ni bawk.

Solar Water Pump hawnna hun hi Pu Lalmawizuala, VCP Lungrang South in kaihruaiin Rev H.Vanlalvawna'n hunserh a hmang a, Er.Zohmingliana S.E PHED Lunglei Watsan Circle in Solar Pump chung chang a sawi fiah bawk.