224/2023-2024

Aizawl The 26th April 2023: Vawiin khan Mizoramin MNREGA Scheme-a kalpui dan zirchiang tura lo kal Pu A.K. Sai J Saravanan Kumar, DRDA Minister, Puducherry leh a team-te chuan Rural Development Minister Pu Lalruatkima kawmna Aijal Club-ah an nei a, Mizoramin MGNREGA Scheme-a kalpui dan zirhonna an nei nghal a ni.

Minister chuan MGNREGA zirchiang tura lo kal Pu AK. Sai J Saravanan Kumar leh a team-te chu Mizoramah a lo lawm tih sawiin, an hlawkpui ngei a beisei tih a tarlang a. Uluk taka zirchianna nei tur leh Mizoramin MGNREGA-a kalpui dan system tha laite chu hawnpui a, hmang ve ngei turin a sawm a ni.

Pu Lalruatkima chuan Mizoramin hlawhtling taka MGNREGA Scheme-a kalpui theih chhan ber chu Deparment-thawktute inpekna, thawhrimna leh beneficiary-te atang a tawiawmna tha tak a awm vang a ni, a ti a. Rethei leh khawsak harsa zawk te tanpui chu sawrkar thiltum lian ber pakhat anih avangin MGNREGA-chu uluk, felfai leh dik taka kalpui anih thu a sawi a. Mizoram chu India ramah pawh MGNREGA kalpui tha ber te zing a mi a nih thu tarlangin lawmman pawh Mizoram chuan a lo lak fo tawh thu a tarlang a ni. Tha tak leh dik taka hnathawhna chuan rah tha a chhuah mek thu tarlangin zirchianna nei tur a state dang atang a lo kal an awm chu lawmawm tiin hmalam hunah zirchianna nei tur tam zawk an lo kal a beisei thu a sawi bawk ani.

Pu A.K. Sai J Saravanan, chuan Mizoramin duhsak taka an mikhual naah lawmthu sawiin, Mizoram in tha tak a MGNREGA Scheme an kalpui thei leh ‘100 % target achievement’ a nei thei chu RD minister thawhrimna leh inpekna a ni tiin Pu Lalruakima hnenah hian lawmthu a hrilh a. Mizoramin MGNREGA a kalpui dan tha tak takte chu Puducherry ah pawh hman ve ngei anih theih nan theihtawp a chhuah tur thu a sawi a ni.

Pi Irene Lalhlimpuii, Addl.Secretary (RD) hnen atangin Mizoramin MGNREGA Scheme-a kalpui dan leh Mizoram dinhmun te ngaihthlak a zirhona neih a ni a. Zirhona atang a alan danin tun dinhmunah MGNREGA chu Mizoram khua (gram panchayat) 866-ah kalpui mek ani a, job card 2,14,384 pek chhuah tawh niin; MGNREGA hnuaia inhlawh thin mi 2,29,685 an awm mek a ni. MGNREGA hnuaiah hna 18,945 tan tawh niin heng zinga hna 13,887 chu zawh tawh a ni a, hnathawh zawh tawh zat hi za zela 73.3 a ni.

Vawiin zirhona neih hi Pi Ethel Rothangpuii, Joint Secretary (RD) chuana kaihruai a, Pu R.Lalthazuala, Director (RD) chuan lawmthu sawina a nei a ni.