Chief Minister Pu Lal Thanhawla chuan vawiin khan Chanmari West huam chhung, Bawngkawn - Sairang Road ah Ford Showroom leh Servicing Station a hawng. He showroom leh servicing station dealer hi Malsawmtluanga, Dawrpui Vengthar niin, a showroom hi MS Ford Showroom tih a ni.

Chief Minister chuan India rama motor tha ber ber lo awm theihna chhan chu Pu Rajive Gandhi te, Dr. Manmohan Singh leh Pu PV Narasimha Rao ten India ah economic liberalisation an kalpui vang a ni a ti a. Mizoramah motor chi hrang hrang dealer an rawn awm thei hi hmun kilkhawr bera awm nimahila, India hmasawnna hi kan chang ve a, a lawmawm hle a ni a ti a. Dealer te chu an mahni inkarah inelna thianghlim kalpui se a duhawm hle ang a ti a. Heng motor tha tak takte hi a leizo te tan chuan a manhla hle dawn a ni tiin, chhungtin hian kan thawhchhuah chhung theuhah khawsak kan tum tur a ni a ti. Thawhchhuah piah lama khawsak tum chu mi mawl awm dan a ni a ti.

Pi Daniella Saltz, Director, Office of General Council, Ford India chuan an Company lo dinchhuah dan te sawiin, India ah chuan kum 1995 khan din tan a ni a, a siamna hmunpui hi Chennai, Tamil Nadu leh Sanand, Gujarat ah te a awm thu a sawi a. Tunah hian India rampuma khawpui 186 ah Ford Dealer 300 chuang an awm tawh a ni a ti.