Kolasib leh Cachar District mipuite inkara inunauna leh inpawhna tha zawk leh boruak tha leh muanawm a awm zel theih nan nimin khan BNMPHS School, Dholai, Cachar District-ah ‘Sports & Cultural Outreach Programme’ buatsaih a ni a. Nimina he programme hawnna hi Kolasib DC Pu Jitender Yadav leh Cachar DC Pu Gokul Mohan Hazarika ten an hmanpui a. Anni bakah hian Kolasib SP Pu RP Meena, Kolasib District Addl. DC Pu Lalfela Sailo, Cachar District Addl. DC Pu AR Sheikh leh Cachar District Addl. SP Pu SP Raimedhi leh District pahniha officer engemawzat bakah Kolasib leh Cachar District-a thuthar thehdarhtu engemawzat an tel bawk a ni.

Kolasib DC Pu Jitender Yadav chuan Cachar DC leh a thawhpui ten Outreach Programme an thlen theih avangin lawmthu hrilhin, hun lo kal zel turah Kolasib leh Cachar mipuite inkarah inunauna leh inpawhna tha leh inlungrualna kan neih phawt chuan buaina leh inhriatthiam lohna awm thin te chu a sutkian theih a, harsatna leh buaina a awm changin dawhkan khat kil a sawiho chuan inremna a thlen thin a ni, a ti. Cachar DC Pu Gokul Mohan Hazarika chuan India ramah hian hnam chi hrang hrang kan cheng a, heng hnam hrang hrang te hian inunauna tha kan neih chuan hmasawnna a kal chak thin a tiin border area a cheng mipuiten hmasawnna lamah hmabak kan ngah em avangin inlungrualna kan neih a pawimawh bik a ni, a ti.

Nimin khan Mizo Cultural Organization (MCO) Kolasib te chuan zai leh lamin Mizo ziarang lan theihna an entir a, chawhnu lamah Football leh Volleyball a intihsiakna neiin Kolasib District aiawh players te an chak ve ve a. Zan lamah Cultural programme hman a ni a. Vawiina 100 metres race, Tug of War leh Kabbadi ah intihsiakna an nei a. Chawhnu lamah he programme hi a kharna neih a ni dawn.

Attachment

  • Loading attachment...