Tuna Financial Year thar lo awm mek kum 2015-2016 chhunga sawrkar budget kalhmang ruahman dan tur chiangkuang taka hriattirna sawrkar laipui atangin Mizoram sawrkarin a la dawn loh thu Finance Minister Pu Lalsawta chuan a sawi.

He thu hi vawiina amah kawmtu Information & Public Relations Department Director leh officer te hnenah a sawi a. Mizoram sawrkarin 14th Finance Commission chhunga a sum hmuh tur tlangpui duan tawh ah tunhma a Plan leh Non-Plan anga dah thin pawh tunah rih chuan hmunkhata a hlawm a dah rih a ni a. State tin specific pawh chiang taka tarlan bik awm lovin, mahni state bil bik chu state sawrkarin a duan tura dah rih a ni a.

State Specific zinga telh “Lok Ayukta” pawh Mizoram state sawrkarin, Central 14th Finance Commission atanga a sum dawn in ruahmanna a siam dawn a ni. Election Manifesto a hemi din tur thu alo tiam tawh chu “State Specific” a mi a ni angin ruahmanna a siam ang Pu Lalsawta chuan a ti bawk.

Tun mai a sawrkar hman tur Budget lailawk atan Rs. 172.40 crore Central atanga hmuh a ni a. Ramchhunga State dangte ang bawkin “Vote on account” in sawrkar a kal rih a, hei hi first installment ang pawhin a sawi theih ang, a Budget pum hlawm beisei mek ah Mizoram Budget hi a tha thawkhat tura beisei a ni a. Central sawrkar leh State sawrkar in Budget a sum in thawh sem dan tur percent bithliah fel fak a hriattirna Central sawrkar in a la pe lo bawk a ni. Budget siamdan tur kalhmang tur a la fiahchian loh avangin sum ruahman felfai a la awm thei rih lo a ni tih Finance Minister Pu Lalsawta chuan a sawi.