Mizoram Chief Minister Pu Lal Thanhawla chuan nimin khan Saiha atangin Lawngtlai-ah a riak phei a, Lawngtlai Circuit House ah amah lawmna inkhawm DC Pu B.Lalhmingthanga hovin buatsaih a ni. Vawiin khan Lawngtlai atangin Thenzawl a panna kawngah Lunglei District chhunga Thingfal khuaah Gas Agency a hawng a, Lunglei-ah Private Hospital hmasa ber tur Hope Hospital a hawng leh nghal bawk a ni.

Thingfal khuaa Gas Agency a hawnnaah Chief Minister chuan Mizoram-ah gas harsatna sukiang turin sorkar chuan a theih chinchin ah hma a la a. Sorkar thuneihna piahlama harsatna a awm hian sorkar mawhpuh leh sawichhiat kan ching thin hi kan in bihchian hle angai a ni a ti.

P.C. RGGLV Gas Agency hi Lunglei district chhungah 5-na tur a ni a, he Rajiv Gandhi Gramin LPG Vidrak Gas Agency hi central sorkarin thingtlang lama thing leh mau humhalhna kawng a hmalakna thar a ni a, Mizoram-ah a 2-na a ni.

Lungleia Hope Hospital (private) a hawn inkhawm buatsaihah Chief Minister chuan damlo mamawh ten tangkai taka an hman theih turin hospital hi a hawng a ni a ti a. A dintu ten mite tana malsawmna ni tur leh hlawkna ringawt um tum vang nilo, inpekna vang zawka kalpui tum a ni chu a lawmawm hle a ni a ti.

Hope Hospital hi Pu Sanghlira Colbert in Lunglei Civil Hospital epa mimal in luah hawha a din a ni a. Tun dinhmun rihah chuan damlo khum, general 6 leh cabin 4 a awm a ni.

Chief Minister hi Ministers Pu H.Rohluna, Pu Lalrinliana Sailo leh Pu Zodintluanga te bakah MLA Pu R.Lalrinawma leh Pu R.L.Pianmawia ten an tawiawm a. Chief Minister hi Thenzawlah riakin, naktukah Vantawng Group YMA conference a hmanpui ang.