No.2190/2021-2022

Aizawl, 10th September, 2021 : Chief Minister Pu Zoramthanga chuan vawiin khan Govt. Aizawl West College-ah zirlai kum 2021 graduate-te lawmpuina pual inkhawm buatsaih chu hmanpui. COVID-19 SOP (Standard Operating Procedure) avangin graduate tam zawk chuan mahni awmhmun atangin online-in an chhim a ni.

Chief Minister chuan zirlai hlawhtlinna changte chu a lawmpui thu sawiin, an kal zelna tura duhsakna a hlan a. Ram leh hnam tana tangkai tak a nih zel a beisei thu a sawi. Khawvel pum tibuaitu hripui leng avanga Mizoram pawhin kawng hrang hranga harsatna a tawh avanga zirna pawh kalphung pangngaia kalpui a ni theilo chunga zirlai ten an theihtawp an chhuan chu lawmawm tiin, zirtirtute thehnemngaihna chungah pawh lawmthu a sawi.

Chief Minister chuan Mizoramin hun khirh tak tak a tawh dan sawiin, COVID-19 hrileng mai bakah vawk pul hri te, lirnghing te, thenawm ram buai leh ramri buai avangte a harsatna hrang hrang tawkin, sawrkar laipui atanga sum hmuh tur ang hmuh loh bawk nen, sum lamah pawh harsatna state in a tawh thu a sawi a. Hetihrual hian sawrkar laipuia sum, state tinte inrelbawlna tura awm chu hmang tangkai tur chuan thil tha leh tangkai siam tur project lian tham ruahman thiam a tul thu a sawi.

Aizawl West-I bialtu MLA Pu Zothantluanga pawhin he hunah hian zirlai hlawhtlingte a lawmpuina thu sawiin, graduate-te chu an kal zelna turah thahnemngai taka bei zui zela hlawhtlinna chang zel turin a duhsakna a hlan a ni.

Govt. Aizawl West College Principal Prof. C. Lalthlengliana chuan graduate-te chawimawina inkhawm hi a kaihruai a. Vice-Principal Pi Lianhlupuii chuan graduate-te chawimawina hun a hmang a. University exam a top ten a lang phate chawimawina H. Vanlalkeuva Award chu Zoramdinthara, Dept. of Political Science hnenah Chief Minister hian a hlan a. He Award hian citation leh cheng sing khat a keng a ni. Zoramdinthara hi university exam-ah panga na a ni.

Govt. Aizawl West College hi May ni 2, 1990 ah khan din a ni a. NAAC 4th Cycle te, Counselling Cell 2003 a din te, 2008 a Prevention Against Sexual Harassment Cell din te, 2012 a Monitoring Cell (tuna Peer Mentoring ni ta) te, 2016 a Citizen's Charter siam leh 2018 a West Impress siam te, MCO hnuaia Affiliated Cultural Club hmasa ber nih leh Sanitary Dispenser neih ah te a hmahruaitu nihna a ni.

Vawiin inkhawmah hian AMC Ward XIII Councillor Pu Lalfakzuala Chenkual pawh a tel a ni.