No.2189/2021-2022

Aizawl, 10th September, 2021 : Vawiin khan Health Minister Dr. R. Lalthangliana hovin DHME Conference Hall, MINECO-ah Mizorama COVID-19 hri kaite enkawl dan chungchang sawiho a ni a. He hunah MOT Chairman Dr. ZR Thiamsanga, MLA Health department hotu pawimawhte bakah ZMC a damlo enkawltu daktawrte, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.

Health Minister Dr. R. Lalthangliana chuan Mizoramah COVID-19 hri kai kan la pun belh zel a, kan tum ber leh sawrkar laipui pawhin min tehna pawimawh ber pakhat chu hri kai zinga nunna hlu tak chan (case fatality rate) kan tam leh tam loh a ni a, hetih kawngah hian pathian khawngaihna vang leh kan zavaia kan tanrual vangin a titha berte zingah kan la tel a, damlote nunna chhan tura thawkrim zawng zawngte tha thlah lovin I tang fan fan zel ang u, a ti.

Vawiin meetingah hian khawvel hmun hrang hranga COVID-19 hri kaite an enkawl dan sawiho a ni a, Mizorama damlote enkawl dan pawh sawrkar laipuiin inkahhruaina a duan zawm a nih bakah kan tana tha thei tur ang berin a tul anga her rem hret hret zel thin a nih thute sawi niin, hri kaite enkawlna atana mamawh damdawi thate chatlak lova kawl reng a nih theih dan turte sawiho a ni bawk.

ZMC-a ICU khum indaihlohna phuhru turin Civil Hospital Aizawlah, ICU khum 10 ruahman a ni a, vawiin lamah company technician ten oxygen line te an endik fel chuan hman nghal thuai theih a ni ang.

Home Isolation-a inenkawlte leh CCC leh CCCC-a inenkawlte chu uluk taka mahni inchik reng tur leh harsatna an neih chuan a rang thei ang bera daktawrte hnena in report thin tura an duh thu uar taka sawi a ni a, damloten harsatna an tawh veleh zep lova an in report a, enkawlna pek hma hi nunna chhan nan a pawimawh em em tih an sawi a ni.