3626/2022-2023
Serchhip, 18.02.2023: Chief Minister Pu Zoramthanga chuan vawiin khan Govt. Serchhip College Administrative Building sak tur lungphum chu khuallian niin a phum. He building hi Special Assistance to States for Capital Investment (SASCI) atanga sum sanction cheng nuai 650 hmanga sak tur a ni. He programme-ah hian Social Welfare Minister Er. Lalrinawma chu khualzahawm a ni.
Lungphum phumna pual inkhawm college tuala buatsaihah Chief Minister chuan Govt. Serchhip College hotute'n administrative building an neih theih nan a an bawhzui dante sawiin, SASCI atanga sakna tur hmun a remchan dan te sawiin, tha taka sak a nih ngei a beisei thu a sawi. Chief Minister chuan Serchhipah hmasawnna tur hmachhawp pawimawh tak tak awmte chu tha taka bawhzui a nih a, midang tan entawntlak an nih ngei a beisei thu a sawi a. College in hma a sawn dan te leh tihchangtlun kawnga an inlungrualna chu fakawm a ti bawk a. Zirlaite chu ram hmasawnna atan mi pawimawh tak tak vek an ni tih hriaa, Pathian tih tak chungin an nun uluk a, an tih tur theuhah theihtawp chhuah zel turin a sawm a ni.
Chief Minister chuan Mizoram chu thlirna thenkhat atang chuan tlangram kalpawh harsa tak, tihhmasawn dawn pawh a hautak tak anga ngaih theih nimahse hmasawnna potential tha tak a neih thu leh, ram min petuin min pek chhan a awm a ni tih ngaihtuahin, ram hausaah kan siam thei a ni tih hre tlang turin kalkhawmte a sawm a ni. Chief Minister chuan hripui lengin min nuai avanga hmasawnna hnathawhin tuar phah mahse boruak zia chho zelah sum harsatna karah pawh tunah sawrkarin theihtawp chhuahin hna a thawh zel thu a sawi.
Minister Er. Lalrinawma chuan sawrkarin zirna a ngaihpawimawh thu sawiin Govt. Serchhip College tan pawh vawiinah a tihchangtlunna tur administrative building sakna tur lungphum phum a ni chu a lawmpui thu a sawi a. Zirna pawhin hma a sawn ngei a beisei thu sawiin, zirlai pawhin hma an sawn zel a beisei thu a sawi a. Zirna/ academics a hmasawn mai bakah nungchang uluk te pawh a pawimawh thu a sawi bawk. Zirna in hma a sawn theih nan heng hmasawnna ruhrel din te hi a pawimawh thu sawiin, zirlai mi hmantlak leh tangkai tam tak an chhuah belh phah ngei a beisei thu a sawi.
Serchhip DC Pi Nazuk Kumar pawhin thu sawiin, Govt. Serchhip College in hmasawnna nasa tak a hmu zel a ni tiin thawktute leh zirlaite thahnemngaihna vang a nih pakhat thu a sawi a ni.
He inkhawm hi Govt. Serchhip College Principal Pi K. Laldinpuii chuan kaihruaiin, college mamawhna sawrkarin ngaipawimawh a, duhsakna a lantir chu lawmawm a tih thu a sawi a. PWD Engineer-in-Chief Pu C. Lianhmingthanga chuan building sak tur chungchang report pein Adviser to CM Pu C. Lalramzauva, Serchhip SP Pu Stephen Lalrinawma te, Higher & Technical Education Department, Public Works Department leh District office hotu thenkhatte an tel bawk a. Vice Principal Pu C. Laldintluanga chuan lawmthu sawiin hun a kar a ni.
Govt. Serchhip College Administrative Building hi 27.02.2023 atanga sak tan tur niin, kum hnih chhunga zo tura ruahman a ni a. Chhawng li awmin, chhawng zawng zawng zau zawng belhkhawm chu 1490.43 Sq.m a zau tura ruahman a ni. Chhawng hrang hrang awm dan tura ruahmanna siam chu hetiang hi a ni:
1) Basement - Staff room for Physics Dept., Chemistry Dept., Zoology Dept., NCC (Army) & NCC (Air wing), IQAC Office, IGNOU, RUSA, NSS Office, Gents & Ladies toilet block.
2) Ground Floor - Principal room with attached toilet, PA room, Establishment room, Staff room for Botany Dept., Accounts room, SU Office, Women Cell Adventure Club, Gents & Ladies toilet block.
3) First Floor - Staff room for History Dept, Mizo Dept., English Dept., BCA Dept., Mathematics Dept., Education Dept., Store, Gents & Ladies toilet block
4) Second floor - Staff room for Political Science Dept., Geography Dept., Economics Dept., Philosophy Dept., Sociology Dept., Store, Gents & Ladies toilet block
Chief Minister hian vawiin hian Serchhip bazar a vantlang hmun a lo zauh zawk nan PWD quarter awmte sawnna tura ruahman chu a hmunah en in, quarter sakna hmun tur awm ang remchang leh bawhzui ngaite PWD hotute nen an sawiho nghal bawk a ni.
Attachment
- Loading attachment...
