163/2022-2023

Aizawl 14.4.2022: Govt. Serchhip College chuan NAAC Grade 'A' Accredication pek an nih lawmna vawiin khan an college campus ah an hmang a. Chief Minister Pu Zoramthanga chuan khuallian niin a hmanpui.

Chief Minister chuan Govt. Serchhip College chu a lawmpui thu a sawi a. Grade tha tak hmu thei chu zirlaite leh zirtirtute hmalakna leh college administration tha taka kenkawh a ni tih a tihlan thu a sawi. Chief Minister chuan an college chuan a țul huna hmasawnna ruhrel din belh zel dawl tur hmunhma rem tak a nei chu vannei tiin hmasawnna an hmuh zui zel a duhsak thu a sawi. Chief Minister chuan development kalpui dawn chuan thinlung leh ngaihtuahna te hi kawng chi tin renga inbuatsaih a ngai a ni, a ti a. Zirlaite chu a bik takin mahni inthunun a, tumruhna nen mahni hmazawn theuh ah theihtawp chhuah zel turin a chah a. Harsatna hrang hrangte hi paltlang turin theihna kan nei tih hria a, min tichaktu ah hman tum zawk turin a chah. Hun kalta a mi ropui tak tak te kha harsatna nasa tak paltlang tawh an nih thu sawiin Chief Minister chuan zirlaite chu an college tan mai ni lo, khawtlang tan pawh a mi tangkai, thawhhlawk an nih ngei a duhsak thu a sawi.

Sports & Tourism Development Board Vice Chairman Pu T.C. Pachhunga, Serchhip bialtu MLA Pu Lalduhoma, Serchhip DC Pi Nazuk Kumar leh Higher & Technical Education Department Joint Director Dr. Lalthansangi Fanai te pawhin an lawmpuina thu an sawi bawk. 

Govt. Serchhip College Principal Dr. C. Vanlalnghaka chuan tun Assessment ah hian CGPA 3.18 pek an nih avangin a thawhpuite chungah lawmthu a sawi a. Dr. C. Vanlalnghaka, IQAC Co-ordinator hnen atangin report tlangpui ngaihthlak a ni. Sub Hqrs. YMA leh Serchhip Teachers' Association ten Govt. Serchhip College lawmpuina thuziak an hlan bawk.

National Assessment and Accreditation Council hi UGC hnuaia autonomous body niin, ram puma zirna in sangah zirna quality tha a awm theih nan a din niin, college leh university te tehfung hrang hrang hmangin a endik thin a ni.


Chief Minister hi Adviser to CM Pu C. Lalramzauva leh Adviser to CM (Technical) Er. K. Lalsawmvela ten an tawiawm a ni 


Attachment

  • Loading attachment...