164/2022-2023

Aizawl, the 14^th April 2022:  "North East on Wheels” expedition a team pakhat Saza - Serow  Team chuan nimin (April 13, 2022) khan Jampui Tlang, Tripura atangin Mizoram rawn lutin chawhnuah khan Aizawl an rawn thleng a. Heng rider te pual hian Governor Hari Babu Kambhampati chuan Raj Bhavan-ah nimin tlai khan Thingpui Ruai a lo buatsaih sak a. Saza - Serow  Team te hi Aizawl khaw pawn, Lengte peng atangin Tourism Minister Pu Robert Romawia Royte chuan Bike khalh in a rawn hruai thleng a ni.

Governor Hari Babu Kambhampati chuan India ram hmun hrang hrang atanga Bike khalha Mizoram rawn thleng te chu Mizoramah hun hlimawm tak hmang turin a lo lawm a. Mizoramah state pawn lam mite la hmuh ngaih loh hmun mawi tak tak, Mizo khawtlang nun entawn tlak tak tak te leh sik leh sa nuam em em te chu pawn lam mite tana rawn zin nawn leh na tham a ni a ti. 

Governor chuan Mizo mipuite chu mi hawihawm tak, khualzinte duatthiam leh remna leh muanna ngaina tak an ni tih a sawi a.  Mizoramah hmun mawi tak tak te a awm rualin pawnlamin an la hre pawh lo hle a. Tun programme avanga Mizoram rawn tlawhtute pawh pawnlammite tana Mizoram chungchang sawihawngtu an nih ngei a beisei tih sawiin an then leh rual te nen Mizoram rawn tlawh leh ngei turin a sawm a ni.

Tourism Minister Pu Robert Romawia Royte pawhin Central sawrkawr ruahmanna hnuaia Hmarchhak state chhung leh hmarchhakmite khawsak dan hriatchian theihna hun Biker te hmanga buatsaih a ni chu dangdai a tih thu leh remchang hle nia a hriat thu a sawi a. Mizoram Tourism hnuaiah pawnlammi ten Mizoram chhunga hun hlimawm tak an hriat reng turin tlawhpawh tur leh belhchian tur tam tak a awm a. India rama hmun mawi tak, mi tam zawkin an la hriat pawh loh te a hmuna rawn belchiang turin tupawh Mizoram mipui ten tha takin an lo dawngsawng dawn tih a sawi a ni.

Pu Atul Kulkarni, Chairman, Amazing Namaste Foundation pawhin North East On Wheels chu Hmarchhak bial hriatchian zawkna tura programme pawimawh tak AKAM hnuaia huaihawt a ni tih a sawi a. Biker te kalna apiangah hian programme awmze nei takin buatsaih a ni a. Biker te tana an kalna hmun leh mi chengte nena inbelhchianna hun a tam thei ang ber siam a ni a. He programme hnuaia Team tin te hian Km 1400 chuang zel Hmarchhak bial hrang hrang fangin an kal kual a. Tlan liam mai lovin hun hlawkthlak tak an hmang zel a ni a ti.

Ni 9 chhung awh, Azadi Ka Amrit Mahotsav lawmna kal zela hmalakna pakhat, Amazing Namaste Foundation in a huaihawt  “North East on Wheels” expedition chu neih mek a ni a. He programme, Central sawrkarin a ngaih pawimawh em em, hmarchhak bial hriatchianna tura Biker 75 te puala North East State hrang hrang fan chhuah programme-ah hian Team 6 siam a ni. Heng team-ah te hian Mizo thalai te pawh an tel a ni. Saza - Serow Team-ah hian Mizo nula Rosalyn Lushai chu Team leader a ni a. Saza Serow Team hian Mizoramah chuan Aizawl, Thenzawl leh Vairengteah te hun an hmang dawn a. Inrinni hian Jowai Shillong a riak lut turin Mizoram an chhuahsan leh dawn a ni.