No.7682/2020-2021 

Vawiin hian Chief Minister Pu Zoramthanga chuan Government Serchhip College re-opening day a hman puia, zirlai naupangte hmaah fuihna thu a sawi.

He hun College Volleyball Court a buatsaihah Chief Minister chuan, zirlai naupangte chu College a kan ramah zirna sang zawka lut tur kan ngah tial tial avangin kan College te nasa takin kan thuam tha zel dawn a, kan ngai pawimawh hle a ni, a ti. Chief Minister chuan khawvela mi ropui bik kan tihte hi mi pangngai tumruhna ropui bik neia bei thin te an ni tih sawiin zirlai naupangte chu chutiang mi chu an ni ve thei vek tih a hrilh a. Khawvelah harsatna hneha mi ropui ni khawpa beitu entawn tur tam tak an awm tawh tih sawiin keini pawhin chutiang mite tih ang chu ka ti thei ve thei vek a, inkhek lovin kan theihna zawng zawng hmangin kan zirlai te kan zir thin tur a ni tiin zirlai naupangte chu anmahnia theihna awm te sawr chhuah tum tlat turin a chah a ni. 

Zirlai naupangte fuihna thusawi inkhawm hi College Principal Pu PC. Lalremsiama'n a kaihruai a. Covid19 laka himna dante zawm chungin zirlai thlan bikte an tel a ni.

Hemi zawh hian Chief Minister hian College hmunhmate a en kual a, Administrative Building hlui leh chep tawh tak sak that an dilna chu a ngaih pawimawh thu thawktute a hrilh a ni.

Chief Minister hi Pu C. Lalramzauva, Sr. Advocate, Adviser to CM in a tawiawm a, Serchhip bawrhsap Pu Kumar Abhishek, IAS, Serchhip College thawktute leh district officer pawimawh ten an lo dawngsawng a ni.