No.7681/2020-2021 

Vawiin khan Tourism Minister Pu Robert Romawia Royte chuan Serchhip dai Bawngchawm hmuna NEC sum, cheng nuai 438 hmanga Paragliding Centre sak mek chu a hmunah a tlawh a, a saknaa mawhphurtu Mizoram Aerosports Association(MASA) leh a satu company te chu uluk taka a sak hna thawk turin a fuih.

Tourism Minister chuan Serchhip Paragliding Site chu India rama paragliding tihna hmun tha ber pawla sawi a ni a, India ram tan pawha hmun hlu a ni a, khawvel pum huap paragliding competition pawh Serchhipah hian thlen zel tum a ni, a ti.

Pu Roberta chuan Serchhip District Boxing Association leh Mizoram Sports Department tangkawpin an buatsaih, “Serchhip Boxing Academy” an kalpui mek pawh a hmunah tlawhin Coach leh Boxing zirlaite chu theih tawp chhuah turin a fuih a.  Serchhipah District Boxing Centre of Excellence din a nih tur thu leh a thuphunga Sports Ministry pawhin sanction a pawm tawh thu a sawi a ni. 

Serchhip District Boxing Association te chuan an beisei phak loh Boxing Centre of Excellence Pu Robert Romawia Roytea hmalaknaa an chang tur chu an lawm thu an sawi a ni.