Vawiin dar 3:00 PM khan Chief Minister Pu Lal Thanhawla chuan Government T. Romana College Campus thar tur Republic Vengthlang-a College hmun hma tur Sawrkarin a pek lawmna programme leh Campus thar-a building sakna tur lungphum phumna programme a hmanpui a. Home Minister Pu R. Lalzirliana, Higher & Technical Education Minister Pu R. Romawia, School Education Minister Pu H. Rohluna, Aizawl South I MLA Pu R. Vanlalvena, Commissioner & Secretary, Higher & Technical Education Department, Pu Benjamina leh Department hotulu dangten he programme hi an hmanpui bawk a ni.

Chief Minister Pu Lal Thanhawla chuan Aizawl khawpui chep dan chu kan hre vek a, chuti chunga Government T Romana College in hetianga hmun hma tha an hmu thei hi an vannei hle a. Phal taka Republic Vengthlang Local Council, khawtlang hruaitute leh veng mipuiin hmathlir thui tak leh ngaihtuahna zau tak neia helai sikul ram hi Government T. Romana College campus atan an pek hi an fakawm a ni, a ti a. Sawrkarin zirna ziktluak leh tha quality education te a phak tawk angin a ngaituah a, zirna tih hmasawnna atan Education Reforms Commission a din a, mahse duh anga sum hman tur Sawrkarin a neih loh avangin a rawtna te chu tihhlawhtlin a harsa a chutichung chuan kan phak tawk leh kan theih ang angin tumna nen an rawtna te tihhlawhtlin kan tum, a ti.

Aizawl khawpuia College tam zawkin hmun hma tha an neih loh leh an hmun neih te pawh a chep thu te, hmun hma tha an neih theih nan Sawrkarin ngaihtuahna sengin an tan hmun rem a dap zel thu te a sawi a. College ten ruhrel(infrastructure) tha an neih chu sawrkarin a ngaihpawimawh thusawiin hemi atan hian RUSA hi tangkai leh tha zawka hman tum a ni a, agency hrang hrang atangin a thei ang angin sum pawh dap mek a ni, a ti. Mimal thenkhat ten zirna in leh Sawrkar ram te dik lo takin khawngaihthlak khawpin an nek chep thu sawiin Government J Thankima College tana Sawrkarin Brigade rama hmun a pek pawh mimal thenkhatin harsatna an siam mek thu a sawi a. Aizawla College tam zawk chu mimal thahnemngaihna atanga din chhoh a ni a, mi hmasa te thahnemngaihna leh zirna atana an hmathlir tihhlawhtling chhoh zel nan kan tanho a ngai a ni, a ti.

Home Minister Pu R. Lalzirliana leh Higher & Technical Education Minister Pu R. Romawia te pawhin thusawiin Government T. Romana College in hmun thar tha tak an neih chu an lamwpui thu te leh hemi atana Education Minister leh bialtu MLA thahnemngaihna te chu fakawm an tih thu te an sawi a ni.

Government T Romana College Campus thar dinna atan hian Sawrkarin Government Republic Vengthlang Middle School hmun bigha 4.7 velah zau hi tunhnaia khan College hnena a pe a. Helai hmunah hian nakum atangin college session tan tum a ni a. RUSA atanga sum hmuh atangin college building, a dung feet 59.5 leh a vang feet 41.4 sak tum a ni a, Ruahman dan chuan he building hi chhawng li a sak tum niin a bultan nan chhawng hnih a sak tum phawt a ni. College sak nan hian Project lian zawk NEC lamah pawh buaipui mek a ni.

Government T. Romana College hi kum 1992 khan zirlai pawlte hmalakna leh Pu T. Romana(Late) mimal thahnemngaihna a din a ni a, 2002 khan he College hi Deficit a hlankai niin 2007 khan Sawrkar College ah hlankai leh a ni. College te endikna tehfung NAAC Assessment hnuhnung ber 2014 a neih a College hi B Grade Accreditation pek an ni. Tunah hian Subject 8 neiin zirtirtu 34 leh thawktu dang 18 awmin zirlai naupang 887 an nei mek a ni.