Vawiin hian Serchhip SP Conference Hall ah Serchhip District Executive Force te tan Dan lova mipui pungkhawm (Riot Drill) hnawhdarh dan leh thunun dan zirhona neih a ni.
Serchhip District Executive Force te tana Riot Drill neih hi Pu Lalchhuanawma Chhangte, Serchhip SDPO in kaihhruaiin, SP Pu Lalringdika chuan a khuh hawnna thu a sawi a. Police te chuan kan tih tur kan hre chiang tur a ni a, kan tih tur kan tihloh avangin harsatna nasa zawk a thleng theih tih hriat fo a tul a ni. Police te zahawmna hi mipui pungkhawm te lakah theihtawp a vawnhim a pawimawh thu leh mipui lamte pawh inzirtir thar reng a pawimawh thu a sawi a, dan lova mipui pungkhawm control thuah Police te chu in diriam zawng leh kut thak hnawih duhna rilru pu ngailo turin a chah bawk.
Pu Lalchhuanawma Chhangte SDPO Serchhip pawhin thu sawiin, dan lova mipui pungkhawm te thunun leh hnawhdarh thuah danin a phal chin te leh Police te hriattur pawimawh chi hrang hrang sawifiahna hun a hmang a ni. He Riot Drill hi chawhma lamah inzirtirna neih niin chawhnu dar dar 2:00 pm ah SP Office tual ah taka mipui lungawilo inhawrkhawmte thunun leh hmachhawn dan tur tih chhinna Demonstration Mock Drill neih ani a.
He Demonstration hi Mizoram Armed Police atangin Pu Daniel Ramhluna, Police Training School Thenzawl in kaihhruaiin Serchhip IOC Veng Kristian Thalai Pawlte nen a tak ang thei tur bera tihchhin a ni.
