Vawiin chawhma dar 11:00 AM khan Joint Electricity Regulatory Commission for Manipur & Mizoram (JERC) chuan Pre-payment Metering System chungchang zirchianna seminar buatsaihin, he hunah hian Chief Secretary Pu Lalmalsawma, IAS chuan khuallian niin hun a hmanpui a ni. I&PR Conference Hall-a seminar buatsaihah hian thla tawp a electric bill pek ngai tawh lova, chhungkaw tinin kawlpetha an hman zat tur mil zel a pawisa pek lawk kalphung thar zirho niin, heihi Manipur State ang bawka Mizorama kalpui a nih thieh nan, Power & Electricity Department officer-te chuan zir chianna an nei a ni.

Khuallian Chief Secretary chuan Pre-payment Metering System chu kalpui theih anih chuan bill pek tlai leh khawn chhung rei lutuk avanga Sorkar sum bawm a lut tur lut tlai lutuk thin te chu pumpelh anih theih tur leh, kawlpetha ‘load’ semzai kawngah pawh nasa taka hmasawnna a thlen thei dawn nia a hriat thu a sawi a. Mipui pawhin kawlpetha an hman zat chiah chiah an chawi dawn avangin bill siam sual vanga buaipui zui ngawi te awm tawh lovin, chhungkaw tin ten an kawlphetha mamawh an hriatchian phah bawk ang a, a lo thlawna kawlphetha hmang an tlem phah dawn bawk avangin a ram pum ang zawng pawhin a insemzai that phah dawn a ni, Pu Lalmalsawma chuan a ti a. Pre-payment Metering System chu khawvel changkanna in a ken tel anih thu sawiin, bill pek chungchangah pawh mipui tan bill pe tura thui tak tak intlar ngai tawh lovin, awlsam te in a pre-payment tihna tur hmun bik engemaw zat ah emaw ATM atang te in a pek theih mai tawh tur thu a tarlang a ni.

Vawiin seminar hi Pu R.K. Kishore Singh, Chairperson, JERC (M&M) chuan kaihruaiin, Pre-payment Metering System atana JERC in a thawhpui company, Secure Meters Limited aiawh ten he kalphung thar hi sawifiahna an nei a. Pu Lalchharliana Pachuau, Chief (Engineering), JERC (M&M) chuan zawhna leh chhanna hun kaihruaiin, Pu Richard Zothankima, Assistanct Secretary, JERC chuan lawmthu sawiin hun a khar a ni.

Pre-payment Metering System hi Mobile Phone-a Pre-paid system ang hi a ni a. Thla tawpa bill pek ngai kher lovin Pre-paid meter a ‘top-up’ thun zat milin electric hman a ni dawn a. Pre-paid mobile phone ang chiahin top-up pawisa a zawh chuan electric hman thei a ni dawn lova, chuvang chuan sum neihin a tlin daih tawk chiah kawlphetha hman theih a ni ang. Hmang leh tur chuan top—up thun thar zel a ngai dawn a ni. Contracted load aia sang current a hman theih dawn lova, meter reading la tur emaw bill pe lo te current tih tawp sak emaw tih nun leh sak turin P&E Department mi leh sa intirh kher a ngaih dawn loh avangin he lama Department sum hloh leh hman a tlem phah hle dawn a ni. Pre-payment Metering System hi hman anih chuan meter thar “Pre-paid meter” vuah a ngai ang a. Consumer ten awlsam zawk nan top-up/ recharge theihna tur hmun bik, ‘outlet’ hi hmun hrang hrangah a tirah chuan siam a ni ang a, a hnu deuhvah Debit/ Credit Card/ Net Banking hmanga ATM Counter-a tih theih tura ruahman a ni ang. Secure Meters Ltd. Chuan Manipur ah he system hi kalpui chhoh mek niin, Phase-I kalpui anih atanga kum khat chhungin bill khawm leh pek chungchangah 100% in hmaawnna hmuh anih thu tarlan niin, kawlpetha mamawh zat, peak demand pawh 56%-a tlak thlak thu an tarlang a. New Delhi ah pawh he system hmanna chhungah chuan electir bill revenue khawm pawh 100% a nih thu sawi a ni.