Nimin khan Chief Minister Pu Lal Thanhawla chuan Lawngtlai khawpui chawmtu tur Greater Lawngtlai Water Supply Scheme lungphum chu tui lakna tur Chhimtuipui lui bul, Lawngtlai atanga Km 7 a hla ah a phum.

Chief Minister chuan Mizote hian sorkar thil te hi mahni ta anga en ngailo kan nih avangin a tlo lo fo thin a. Chuvangin tuna lungphum tak hi kan zavaia thatna tur anih avangin, alo puitlin hunah mahni ta ang a ena, a enkawlna ah pawh PHE hnathawkte tanpui thin turin a chah a. GLWSS hi Lawngtlai mipuite tan hmasawnna rahbi pawimawh tak a ni dawn a ni a ti. Mizoram chhim lam hi tunhmaa kan kawtchhuah ni thin, Bangladesh nena insumdawn tawnna a puitlin hunah leh Myanmar lawngchawlh hmun Sittwe te kaltlanga Kaladan Multi Modal Transport Project alo puitlin hunah chuan Bay of Bengal tuipui zuk pawhin, kan kawtchhuah ani leh thei dawn a ni a ti a. Tuna Chhimtuipui atanga kawlphetha siamna tur NTPC in bul atan mek hi compensation in atih buai loh nan ram pe phal turin mipuite chu a ngen bawk a. Compensation avang hian Project lian tham kan neih te hi a tithuan thu mai nilovin kan cham phah theih hial a ni a ti. Chuvangin hetiang hi a thleng loh nan compensation hi beisei lovin kan ram leh ro a ni tih hria in ram kan neih te hi phal taka pe zawk thin turin mipuite chu a chah a ni.

GLWSS siamna tura senso ruahman chu Rs.25,64,50,000.00 a ni a. Sum hi DoNER Ministry atanga sanction a ni. A siam zawh hun tur atan October 2013 ruat a ni. Hman theih anih hunah chuan Chhimtuipui atangin nitin tui litre maktaduai 1 leh nuai 6 vel pump chhoh a ni anga, kum 2040 thleng nitin mi pakhat tan tui litre 40 zelin mihring 38, 500 chawm thei tura ruahman a ni.Tui pumpna tur kawphetha hnianghnar tak neih theih nana electric power sub station thar bun a ni bawk ang.

Chief Minister hi a nupui Pi Lal Riliani bakah Pu H. Zothangliana, Parliamentary Secretary, Pu R. Lalrinawma, Chairman Law Commission leh Pu T.T. Zothansanga, MLA ten an tawiawm a ni.

Lungphum inkhawm hi Lawngtlai DC Pu B.Lalhmingthanga’n a kaihruai a ni.