Vawiin khan Chief Minister Pu Lal Thanhawla'n Mizorama mimal damdawiin private hospital hmasa ber Greenwood Hospital kum 25 tlin Silver Jubilee lawmna programme Tourist Lodge Chaltlang a buatsaih chu khuallian niin a hmanpui a. He hun hi Health Minister Pu Lal Thanzara pawhin khualzahawm  niin a hmanpui bawk a ni.

Chief Minister Pu Lal Thanhawla chuan Dr. Lalbuatsaiha te nupa tumruhna, taihmakna leh inpekna chu fakawm leh ropui a tih thu sawiin Mizoram mamawhna hria a an din, Sawrkar leh mipuiten an hmang tangkai em em, damna petu Greenwood Hospital in kum 25 hmel a hmu chu a lawmpui tih a sawi bawk a. Greenwood Hospital hian damlo tan damna a pek mai bakah kum 25 chhungin mi tam tak tak eizawnna kawng a siamsak a, hei hi thil entawntlak nia a hriat thu sawiin tunah chuan mimal damdawiin engemaw zat kan nei tawh a, hriselna lamah kan changtlung chho zel hi a lawmawm a, Mizote tan malsawmna chi khat niin ka hria a ti a. Sawrkar a changtlung lo tih hriain leh Mizoram tan thinlung takin rawngbawlna rilru pua Dr. Lalbuatsaiha te nupa in kum 25 hma lama Greenwood Hospital bul an tanna kha an fakawm a, midangte kawng an kawhhmuh a, hriselna lamah Sawrkar pui tur midangte lo awm zel hi Mizoram leh mipuiin kan chhawr tangkai hle a ni, a ti a. Chutih rualin faina leh thianghlimna vawn kawngah te leh bawlhhlawh chitin sawngbawlna kawngah te private hospital te hian eng angin nge hma an lak tih erawh ngaituah zui a tul nia a hriat thu a sawi bawk.

A sawi zelnaah Chief Minister chuan damdawiin tha kan mamawh a mahse damdawi in luh ngai lo leh a mamawh loh zawngin engtin nge kan hriselna hi kan enkawl leh kan vawnhim ang tih hi kan ngaihtuah a ngai a,  kan nun, kan khawsak zia leh kan ei leh in kan uluk a kan fimkhur chuan damdawi in mamawhna kan nei tlem dawn a ni, a ti. Natna tam tak hi kan nun kan uluk loh vanga chochhuah a awm thei a, hengte lamah hian Ringtu kan nihna zawn atangin cancer leh HIV/AIDS vei kan nei te hi kan in bihchian a tul hle in ka hria, a ti. Hriselna tha neihna kawng ‘health conciousness’ lamah tan lakna tur kan nei a, kan hriselna theuhah mahni theuh kan pawimawh a, kan tana thalo thil tih leh ei leh in lamah insum te hian kan taksa kan chawimawi a chu chuan Pathian kan chawimawi a ni, a ti.

Greenwood Hospital chu mimal damdawiin ah a hmun hma leh building nei tha pawl nia a hriat thu sawiin hun lokal zel turah hawhtling leh changtlung zawka an rawngbawl hna hi kalpui se a duh thu sawiin duhsakna a hlan a ni.

Health Minister Pu Lal Thanzara chuan kum 25 chhung Greenwood Hospital in Pathian kaihhruaina duhawm tak dawnga mipuite tan hriselna kawngah rawngbawlna an kalpui chu a lawmpui thu sawiin phai kal thei lo te tan doctor thiam an chahchhuah hi damlo ten an chhawr hle in a hlu takzet a ni a ti a. An rawngbawlna in Sawrkar ko an tih zangkhai thu te, thawhhona tha tak an neih thu te leh thalai mithiam nurse leh doctor te bakah midang te tan eizawnna kawng an siam sak chu fakawm a tih thu te sawiin an kal zelna turah duhsakna a hlan a ni.

Programme ah hian Rev. Dr. Lalchungnunga’n hunserh a hmang a. Dr.Lalbuatsaiha Ralte chu damlohna avangin amah damdawi inah enkawl mek anih avangin a nupui Pi Ziri Ralte in Hospital din chhoh dan chanchin tlangpui sawiin Admin staff inhmelhriattirna a nei a. A tir atanga tun thlenga la thawk mi 3 hnenah lawmthu sawina thuziak a hlan nghal a. Sawmbik thenkhat ten thusawina an neih hnuin Dr. L.N. Tluanga Benediction hmangin progamme a titawp a ni.

Greenwood Hospital hi Mizorama private hospital hmasa ber niin Dr. Lalbuatsaiha Ralte in February 1992 a din a ni a. A tirah khum 20 neiin bul an tan a ni a. Tuna an hmun nghet ah kum 2003 khan insawnin damlo admit thei  khum 82 an nei mek a, thawktu 130 an awm mek bawk a. Khum 100 awm theihna tur ruahmanna an siam mek a ni. A dintu Dr. Lalbuatsaiha Ralte hi Mizo zinga Member of Royal College of Gynaecologists & Obstetricians (MRCOG) leh Educational Council for Foreign Medical Graduate (ECFMG) Certificate nei hmasa ber a nia. Kum 1974 atangin kum 1991 thleng Australia ah a thawh hnuin kum 1991 tawp lamah Hospital din turin Mizoram ah a rawn chhuak chho a ni.

Mizoram mipuite mamawhna hriain NGO te, Mizoram Sawrkar leh Central Sawrkar te nen thawk ho in Workshop, Seminar, Free Clinic, Health Camp leh Symposium te an buatsaih thin a. Kum 2008 atangin Smile Train Project (cleft and palate surgery) hlawhtling taka kalpui mekin hmui leh dang kak mi 322 a thlawnin an zai tawh nghe nghe a ni.