Vawiin khan North Eastern Council(NEC) Secretariat, Shillong-ah India hmarchhakbial chhung tihhmasawn dan tur, Draft Regional Plan for all round development of North Eastern Region, NEC in a duan chu sawihho a ni.

NEC meeting kaihruaitu Pu C.K. Das, Member, NEC chuan hmarchhak bialchhunga hmasawnna tluantling leh ngelnghet zawk a lo awm theih na tura hmalak dan tur NEC in a duan te a sawifiah a. India Hmarchhakbial chhung bika hmalaknate a lo putlin nan leh hmasawnna ngelnghet a awm theih nan phur taka thawhhona neiha pawimawh tih tarlangin Central Ministry hnuaia Department hrang hrang North Eastern Region a pisa nei te leh state sawrkar hnuai department zawng zawng te inpawh tlang taka an thawhho a tul a ti a. Ngun taka hmalakna te viltlan a nih theih nan zing zawk leh tam zawka sawihona nei tura inhmuhkhawm te pawh a tul ang a ti.

Pu Ram Muivah, Secretary, NEC chuan meeting-ah hian NEC palai te lo dawngsawngin NEC in hmalakna a kalpui mek leh hmachhawpte a lo hrilhhriat a. Ministry of Health, Ministry of Power,ICAR, Airport Authority of India, NESAC, UGC, MSME, Sports Authority of India leh Central Sorkar aiawh mipawimawh te he hunah hian an tel a ni.