Nimin khan Chief Minister Pu Lal Thanhawla chuan CBCNEI Mission Compound Guwahati-ah North East India Congress on Church in Mission (NEICOCIM) inkhawmpui a hmanpui a. He inkhawmpui ah hian Evangelical Fellowship of India (EFI) chuan Chief Minister Pu Lal Thanhawla hnenah Pathian rawngbawlnaah a inpekna chu chawimawiin, Lifetime Achievement Award an hlan a ni.

Pu Lal Thanhawla chuan phulo tak chunga chawimawina hlu tak Lifetime Achievement Award EFI in an hlan chu lawmthu a sawi a. Mizoramah remna leh muanna ah awm theih nana tlawmtea ke a lo pen thin tawh nate hriatsakna, an hlutsaknaah lawmthu thu a sawi bawk a. Pu Hawla chuan ‘kristian tha ka ni ka inti ngailo, mahse Pathian ropuina tur leh a Ram zauhna turah chuan ka tlin leh phak ang zelin hma ka la ve thin a ni a ti a. Mizoramah remna leh muanna a awm theihna tura ka inpekna tlawmte chu Pathian kaihhruaina avangin vawiin thlengin remna leh muanna kan nei ta a. He ka inpekna tlawm te hi min hriat saka, ram chhungah, abikin hmarchhak biala hetiang buaina nei ten, an buaina chinfelna hmanruaah hmang ve thei se ka duh hle a. He chawimawina an hlan hian amah a chawimawi lova, Pathian leh Kohhran a chawimawi zawk a ni’ a ti.

Chief Minister chuan EFI member a nihna chu a chhuan hle thu sawiin EFI in Hmarchhaka remna leh muanna atana ke an pen nate, an hmalak nate leh chi leh chi inkara boruak tha a awm theih nan an hnathawh te chu a ropuiin a fakawm tak meuh a ni, a ti a. June 1992 a Kuki leh Naga te inkara buaina a chhuah tum leh April 2003 a Cachari-Dimasa leh Hmar inkara buaina a chhuah tuma, sorkarin remna leh muanna zawnga a hlawhchham hnuah, EFI hruaitu ten an mahni sa himna pawh ngaihtuah lova remna leh muanna atana an hmalaknain vawiin thlenga heng kan unaute inkara boruak tha a awm ta te hi Pathian ropui zia leh Pathian in a mite a hmangaih zia tilangtu a ni, a ti.

NEICOCIM thupui ‘Ministry for Mission’ chungchang sawiin Chief Minister chuan EFI hma laknaah Missionary Training Centre, Satribari, Guwahati a din tumna hian Hmarchhak mai nilo rampuma Chanchin Tha hrilna kawngah te leh Missionary intirhchhuahna kawngah thui tak a pui thei dawn a ni, a ti a. He centre hian hmarchhak atanga missionary tam zawk tirchhuaka, kohhran hrang hrangte inkara inpawhtawnna siamtu anih ngei a beiseiawm a ni a ti.Pu Hawla chuan khawvel hmun tina Chanchin Tha hril tura koh vek kan ni tiin, kan zavai hian englaipawha kristian hnathawk (Full time Christian Worker) ni theilo mahila, englaipawha kristian tha kan ni thei reng a ni a ti. Pathian ringtute hi tun hnaiah khawvel thlang lam ramah te nasa taka kristianna a tlakhniam avangin missionary tam thei ang ber kan tirhchhuah pawimawh a tih thu uar takin a sawi bawk a ni.