Vawiin chawhma dar 10:00 khan Higher & Technical Education Parliamentary Secretary Pu H. Zothangliana’n Govt. Hrangbana College Golden Hall Extension-ah Mizo Writers’ Association leh Govt. Hrangbana College te tangkawpin an buatsaih ‘National Seminar on Rambuai Literature’ chu khuallian niin a hmanpui.

Pu H. Zothangliana chuan Seminar hawnnaah thusawiin, Mizoram buai khan thil tha lo leh hriat reng tlak loh thil tam tak a rawn thlen a. Thenkhat tan tahna, mittui tlakna leh lungngaihna a thlen a, mipui tan pawn tuboh leh dolung inkar nun a thlen bawk a ni a ti. A hun laiin a tuartu mipui tan hrehawm hle mahse tunlai thangtharte tan literature lamah hlawkna thlentu ni thei se, a bik takin researcher te tan pawn awmze thuk zawk neiin zir zel dan awm se a tangkai tur thu a sawi. Rambuai lai khan Independent dik tak beisei leh tum tak taka beitu an awm ang em ? tih hi amah pawhin a lo ngaihtuah fo thu a sawi bawk.

Mizo Writers’ Association hi kum 1977 July ni 23-ah din a ni a. A din tirha hruaitu hmasate chu heng mite hi an ni. President - Pu C. Rokhuma, Secretary - Pu R.L. Rina, Finance Secretary - Pu R. Lalrawna, Members - Pu J.F. Laldailova, Pu Selet Thanga, Pu James Dokhuma.

He Seminar-ah hian Mizo Writers’Association Member te, Govt. Hrangbana College -a zirtirtute leh zirlai thenkhat te, MNF Returnees Association member te, thu leh hla lama tui mi thahnem tak an tel a, a hnuaia tar lan thupui hrang hrangte hi ni lengin an zir ho a ni.

1. Rambuai hrin chhuah tawngkam By Lal Rinawma

2. Zoram Buaia innghat thutluang (prose) Bute thlirna By B.Lalthangliana

3. Rambuaia innghat Mizo lemchan thawnthu (Drama) By Darchuailova Renthlei

4. Rambuaia innghat hlate By C.Vanllalawma

5. Rambuaia innghat thawnthu (Novels) te By R. Lallianzuala

6. Rambuaia innghat Mizo khawtlang a ngawng dan By Prof. J.V. Hluna