Vawiin khan Mizoram Art Development Society ( MADS ) leh Mizoram Sawrkar Information & Public Relations Department tangkawpin an buatsaih Painting Exhibition chu Vanapa Hall chhawng chung-ah Pu Jim K. Chozah, Information & Public Relations Director-in a hawng.

Painting Exhibition hian November ni 14 thleng a awh dawn a, hemi chhung hian nitin zing dar 10 atanga tlai dar 4 thleng a duh apiang tan Painting pho chhuahte hi en theihin a awm dawn a, a duh tan a lei theih bawk a ni.

He painting Exhibition hi MADS din champha lawmna nipah fawma buatsaih a ni a. Exhibition hawngtu Pu Jim K. Chozah, I&PR Director chuan thu sawiin , Painting hian mi rilruah thu tamtak a sawi theih avangin a hlu em em a. Ram pawn leh hmun hla tak tak thleng pawha Mizo zia leh hmelhmang ril taka pho chhuaktu a nih avangin kan uar deuh deuh a tul a ni, a ti a. Sawrkara kan rawtna te ala puitlin hunah chuan Hall lian leh changkang takah heng painting tehi kanla neih chhoh thuai ka beisei a ni, Pu Jim chuan a ti bawk a ni.

Pu Laltanpuia, President, MADS , hawnna hun kaihruaitu chuan, Information & Public Relations Department hmalakna avanga Mizorama Painting timi te tana inpho chhuahna hun tha leh hmalam an pan ve theihna tura an puala sawrkarin ruahmanna a siam chu lawmawm a tih thu a sawi a. Keini ho pawh hian kan thiamna tat hriam turin tan kan lak nasat hle a tul a ni, a ti.

Pu Vanlalhriata, General Secretary, MADS chuan report pein tun tumah hian Painting tharlam hlir 96, mi 42 hnen atangin chhawpchhuah a ni, a ti a ni.

Exhibition hawnna-ah hian Pi Lalnithangi, Joint Director leh Pi Lallianpuii, Dy. Director, I&PR te pawh an tel a ni.

Attachment

  • Loading attachment...