Vawiin chawhma khan Seventh Day Tlangah Chief Minister Pu Lal Thanhawla chuan Helen Lowry College of Arts & Commerce(HLC) a hawng a. HLC hi Mizoram University, Tanhril hnuaiah a inziak lut a ni.

HLC hawngtu Chief Minister Pu Lal Thanhawla chuan Arts & Commerce zirna College din a ni chu lawmawm a tih thu a sawiin atam thei ang bera mithiam chherchhuak turin duhsakna a hlan a. Mizoram in Science leh Commerce Graduate chhawrtlak tam tak kan hmalawka Mizoram hmabak thlirin a mamawh a ni a ti a.

HLC dintu leh enkawltute chu Fai, hriselna leh zuk leh hmuam insum theih kawngah mite hriathlawh an nih angin an zirlai te pawh college dang te entawntlaka zirtirna pe turin beisei an ni a ti.

Mizoram hmasawnna turin hmalakna liantham NLUP leh NEDP te bakah kawng tinrengin sawrkarin theihtawp chhuahin hma a la mek a. Sawrkar hmathlir te leh hmalakna puitlina tura innghahna erawh mipui te an ni a. Mipui zingah mi hrisel, mithiam chhawrtlak, lehkhathiam chhawrtlak, thiamna a export quality nei leh a tak tak a thawk duh mi an tam a ngai a ti a. 

"Saptawng huphurh, Vaitawng hmusit leh si eng tawng emaw tal pawh thiam nal tak tak lo Mizo te zingah kan tam a, kan chhehvel a mi te tawng kan hriatthiam hi engkimah a pawimawh tih kan hriat a ngai", a ti a. Hnamdang te pawng nek ngawt chu thil sawt ber a nih loh avangin zirna, thiamna leh thluakin an tih theih leh an aia thiam tuma tan lak chu Mizoram a Mizo te tana tanlakna tur thil hmanhmawh thlak a ni tih a tarlang a. "  "Mizoram hi kan hma lawkah Myanmar leh Bangladesh te nena insumdawn tawnna bakah KMMTP avangin 'Gateway for South East Asian Markets' a ni dawn mipui te, a bikin thalai te an inpeih a hun a. Sittiwe Lawngchawlhnaah pawh kan hman tur te thlenga peihfel mek a ni tawh", a ti.

Hmasawnna tura sawrkar hmalakna zawng zawng te ti hlawhtling thei turin mipui hrisel an pawimawh ber a. Hriselna neitur chuan thianghlimna leh zuk leh hmuam laka insum theihna a pawimawh a ti a. "Vaihlo kaihnawih thil hian kan taksa mai a ti bal lova; cancer thlentu kuhva  kan  eina te phei chuan kan ha bakah kan  khawlai a bang te leh ban te thlengin mawilo takin a ti rang tawh a ni", a ti. Ringtu za a za inchhal kan nih anga kan mawhphurhna chu midang te aia hrisel zawk leh thianghlimna kawnga entawntlak nih hi a ni ", a ti a. Tun dinhmuna Mizoram a natna khirh tak tak vei an tam ta leh zuk leh hmuam insum kawngah nasa taka tanlak a ngai ta chu inenfiahna tur a ni a ti.

Helen Lowry College hawnna inkhawmah hian Principal Dr. Biakzidinga Renthlei in report tawi a pe a. Khualzahawm, Mizo Conference of SDA President  Pastor R.Biakthansanga'n HLC college din a nih dan leh College hmathlir te a sawi a ni.

HLC ah hian Admission hawn mek niin Arts leh Commerce subjects ah zirtirna kalpui a ni dawn a. Tunah hian admission la tawh zirlai 50 awm mek nen class tan a ni dawn a ni.