Mizoram RMSA buatsaih zirtirtu lak tharte pual Induction Training chu vawiin khan SSA Training Hall, Chaltlang, Aizawl-ah tan a ni a; State Project Director, RMSA leh School Education Director ni bawk Pu K.Lalthawmmawia, IAS-in training a hawng.

Pu K.Lalthawmawia chuan thu sawiin zirtirtu lak tharte chu naupangte avanga awm an nih thu leh naupangte chu mihring rintlak, ram tana innghahna tlaka chher turin a fuih a. Zirtirtu hna chu classroom chhungah chauh a tawp lova, a piah lamah tih tur leh hlenchhuah tur a tam a ni, a ti a. Naupangte chu sual kawng an zawh lohna tura mawhphurhna nei lian ber chu zirtirtute an ni. Zirtirtute chu an awmna theuhah nun danglam ‘Change’ thlentu ni turin a chah a, an thawhna hmun theuhah rinawm taka awma, Conduct Rules zawm turin a chah a ni.

Vawiina RMSA zirtirtu lak tharte tana Induction Training hawnna inkhawm hi Pu Lalhmachhuana, Addl. State Project Director, RMSA-in a kaihruai a, zitirtute tan training a pawimawh thu leh training ngai pawimawh lo tan zirtirtu a nih theih loh tur thu a sawi. He training-ah hian RMSA zirtirtu lak tharte an kal tha hle a, ni 10 chhung an training dawn a ni.