No.7004/2020-2021

Chief Minister Pu Zoramthanga chuan vawiin khan Health & Family Welfare Department hnuaia Multi Disciplinary Training Centre, ITI veng ami chu a hawng. He centre hi Infant Mortality Rate (nau piang 1000 zela thi zat) tihniam kawnga Mizoram a thawh that avanga sawrkar laipuiin incentive grant a pek atanga bultan a ni.

Chief Minister Pu Zoramthanga chuan medical mi te tana training centre, thiamna belhchhah mai baka ngaihtuahna hmanna tura inzirtirna hmun buatsaih a ni chu lawmawm a ti a. He centre hi siam thei a hun hma lama hma lo latu te chungah lawmthu a sawi a. Thiamna leh hriatna awmsa ring ringawt a khawvel hi kal tur kan nilo, tiin Chief Minister chuan kawng tinrenga vision siamsak tura intuhna hmun lo ni se tiin tangkai taka mipui leh state tana thawhhlawk tura inbuatsaih a hnum a nih ngei a beisei thu a sawi.

Chief Minister chuan covid hripui leng  avangin ram hmasawnna hna dang pawh thawk tam theilo in, damkhawchhuah ngaipawimawh hmasa ber a inrelbawlna kalpui a tul tak thu a sawi a. Harsatna hrang hrang awm mahse vawiin thlenga chaw nghei lova kan awm te, he hrileng do tura mitin hmalakna te chungah lawmthu a sawi nghal a ni. Chief Minister chuan health department te thawh thatna chungah lawmthu a sawi bawk.

H&FW Minister Dr. R. Lalthangliana chuan sawrkarin ram hmasawnna atan mipui hriselna tha zawk a pawimawh tih a hriat avangin leh inenkawlna kawnga hmasawn tura Healthcare scheme te, hospital leh zirna in tihchangtlunna atana sum sanction dan te, cancer specialty hospital JICA nena thawkho a din leh kawng hrang hranga hma lak a nih dan a sawi a. Health Minister chuan COVID-19 hrileng hmachhawn chungchangah Mizoram chu India rama ti tha ber a nih thu sawiin, Chief Minister hmalakna vang a nih thu leh Health Department leh mipui tawiawmna vang a ni, a ti a. Vawiina training centre hawn tak pawh health lama thawktute hmalak that vanga awm thei a nih thu leh, tang taka hna thawk zui zel turin thawktute a chah a ni.

H&FW Board Vice Chairman Dr. Z.R. Thiamsanga pawhin thu sawiin, medical mi te chu an thiamna leh hriatna in update zel ngai an nih avagin chumi atana tangkai tak tur training hmun tha a awm ta chu lawmawm a ti a. IMR leh Maternal Mortality Rate (MMR) hi ram mipui changkanna tehna pawimawh tak pakhat a nih thu sawi bawkin Dr. Z.R. Thiamsanga chuan Mizoram dinhmun chu state dang te khaikhin chuan tha viau mahse hma sawnna tur tam tak a la awm avangin state angin leh district ang pawhin thahnemngai taka hmalak chhunzawm zel pawimawh a tih thu a sawi a ni.

Multi Disciplinary Training Centre hawnna inkhawm hi H&FW department Secretary Pu H. Lalengmawia chuan kaihruaiin, Principal Director Dr. F. Lallianhlira chuan lawmthu sawiin hun a khar a ni. Sr. EE Pu C. Lalkima chuan technical report a pe a.

Multi Disciplinary Training Centre hi IMR tihhniam kawnga incentive grant kum 2015-2016 a dawn (1875 lakhs) atangin sak tan a ni a, a zawh felna atan State Finance atangin sum dawn a ni bawk. RCC building chhawng nga (Basement-1, Basement-2, Ground floor, First floor leh Second floor) niin chhawng tin zau zawng belhkhawm chu 1605.92 metre bial a zau a ni a. Work order amount Rs. 6,16,28,732/- a ni a. Classroom pali, recreation room, director room, video conferencing room, faculty room, library, auditorium, kitchen, dining hall, recreation room leh thildang dang te a awm a ni.