Vawiin chawhnu khan Chief Minister Pu Lal Thanhawla’n Hindi rimawi(video) album Pu Gunu Gharti’n a buatsaih thar ‘Lovely Mizoram’ tih chu Oasis Hall Thuampui-ah a tlangzarh a, he programme ah hian Chief Minister nupui Pi Lal Riliani pawh a tel a ni.

Chief Minister Pu Lal Thanhawla chuan kan ram chhungah Hindi tawnga music video hmasa ber tlangzarh theia a awm chu lawmawm a tih thu tarlangin India khua leh tui kan nih chhung chuan Hindi tawng hi a pawimawh reng dawn a ni a ti a. Mizote hian kan khawhawi kan tih zauh a tul thusawiin Khua leh Tui kan nihna ramah kan tlangnel nan leh inpawhtawn nan India hnampui tawng Hindi hi thiam a tul a ni a ti bawk.

Tawng inhriattawnna hian chi leh chi inkara inunauna leh inpumkhatna a siam theih dan te, rimawi(music) in chi leh chi a thliar hrang ve lova inpumkhatna atan hmanraw tangkai tak a nih dante sawiin Chief Minister chuan vawiina he music video tlangzarh pawh in hetiang kawngah rah duhawm tak a chhuah ngei a beisei thu a sawi bawk a ni.

Album-ah hian Mizo zaithiam engemawzat in Hindi hla an sak a tel a.Album ah hian Mizoram hmel lanna leh Ram ngaih hla te a tel a ni. Album buatsaihtu Pu Gunu Gharti chuan Mizo leh Gorkhali te inkarah inunauna thuk lehzual alo awm theih nan te, tun aia nasa lehzuala Mizoramah Hindi tawng a lo lar nan te leh Mizoram chhunga cheng hnam hrang hrang te inkara inunauna a lo pun zel nan te he rimawi album hi a buatsaih a ni a ti.

Pu C. Dinthanga, Editor, Lelte Weekly leh Dr. V.R. Ralte, President & Director, UHCC te hian album tlangzarh hun hi an kaihruai a ni.