Vawiin zing dar 9.30 atang khan nileng awh turin Biate khuaa Zialung Community Hall-ah Teachers' Day cum Cultural Programme hman a ni a; he programme hi MZP Headquarters, Biate buatsaih a n a; FCS&CA Minister Pu H. Rohluna chu khuallian a ni a; Pu K. Lianzuala MLA, MKVIB Chairman chu Khualzahawm a ni.

Pu H. Rohluna chuan, "Zirna tha hi ram hmasawnna hnukpui ber a ni a; chuvang chuan zirtirtute dinhmun pawimawhna hi sawi mai aiin a thuk a. Ram hruaitu leh hnarkaitu zawng zawngte hi zirtirtuten puma an chherchhuahte an nih miau avangin 'zirtirtute hi ram leh hnam dintu' an ni kan tih pawh hi a dik em em a ni" a ti a. Teachers' Day-a Biate khawtlangin lungrual taka an khuaa zirtirtute chawimawina an buatsaih chu entawntlak a tih thu sawiin, "Zirtirtute hi zirlaite chauhvin an chawimawi turah kan dah tur a ni lova, nu leh pa leh mipuite hian kan chhungkua leh kan ram nakin hun atana kan tu leh fate min enkawlsaktute hi kan chawimawi thiam a tul a ni" a ti. Zirtirtute chu an mawhphurhna a san em avangin an hnaah inpe zo turin Pu H. Rohluna chuan a fuih a, "Mahni hnathawhna tur hmunah rinawm takin kan awm tur a ni a; chutiang bawkin khawtlang pawhin khualkhua atanga zirtirtu kan neihte kan lo dawngsawng thiam tur a ni" a ti. Mizoram sawrkar chuan Mizoram-a zirtirtu indaih lohna leh hmun thenkhata buk bik awma sawi thin chingfel tur leh rualkhai taka zirtirtute sem darh an nih theihna turin DP&AR hmangin survey a zo tawh a, reiloteah zirtirtu indaih lohna avanga harsatna hi chinfel tum a nih thu a sawi bawk. Pu H. Rohluna chuan zirna school din tam lama thahnemngaih ai mahin zirna quality tha chu ngaih pawimawh a tul thu sawiin, "Tun hma chuan Mizo lehkhathiam tam tak civil services leh central service chi hrang hrangah te, sipai officer ah te an lut zut zut a; tunah chuan Mizoram sawrkar inrelbawlnaa a fawng vuantu tur IAS te, IPS te, Forest Service te kan nei mumal ta lova. Hei hian kan zirna quality lamah tanlak a pawimawhzia a tichiang hle a ni" a ti.

Khualzahawm Pu K.Lianzuala pawhin thuchah sawiin, "Zirtirtute hi hna zahawm chelhtu leh chawimawitlak an ni a; chutih rualin mahni hna pawh thawk hleithei lo khawpa dawngdah an awm thin hi a pawi hle a ni. Chawimawitlak leh entawntlak ni theuh turin he Teachers' Day-ah hian zirtirtute i inhlan thar ang u" a ti.

Vawiin a Teachers Day cum Cultural Programme ah hian Biate khua a sikul 8 zirtirtute chu zirlaiten chawimawina pangpar leh thilpek te an hlan a ; tun hnaia Biate tlangval M. Phil Pass thar Tv. Vanlalruatfela Hlondo hnenah chawimawina thuziak MZP Hqrs. Biate chuan an hlan bawk. Chawhnu lamah leh zan lamah zirlaite hian Mizo hnam lam chi hrang hrang entirin zai leh rimawi a intihhlimna hun an chhunzawm a ; Teacher Day pual hian sikul naupangte leh zirtirtuten ruai an theh a ni