Mizoram sorkarin tunhnaia Higher Secondary School Lecturer contract basis a thawklai 116 te a tihngheh (regularised) avanga lawmthu sawina, Higher Secondary School Lecturer Association of Mizoram (HISSLAM) in vawiina Thanks Giving Prgramme I&PR Auditorium a an buatsaihah Chief Minister Pu Lal Thanhawla chu khuallian a ni.

Chief Minister chuan HISSLAM in lawm nachang an hria chu Pathian duh zawng a ni tiin, lawmna hun an buatsaih chu a lawmawm hle a ni a ti a. Sorkar nena an indawrna thin ah hriatthiamna nen an dawr thinnaah lawmthu a sawi bawk. Chief Minister chuan eng hna pawh thawk ila, kan awmna apiang hi Pathianin mite tana malsawmna ni tura min dahna a ni a, taima tak leh rinawmna nen tui taka thawk tur kan ni a ti a. Ringtu kan nihna nen pawh a inhmeh hle a ni a ti.

Chief Minister chuan zirtirtu hna hi hna pawimawh tak, mihringte chhertu a ni a, hna zahawm a ni tih hriaa, midangte abikin zirlaite entawn an nih avangin chhung lam leh pawm lam nun uluk a tul hle a ni a ti a. Incheina thlenga in uluk turin zirtirtute chu a chah a ni. Zirtirtute zingah inthlahdah an awm thin chu pawi a tih thu Pu Hawla chuan a sawi a. Inthlahdahna hian chhungkua leh khawtlangah nghawng thalo tak a siam theih avangin englai pawha inbih chiang reng thin turin a chah a ni. Chief Minister chuan zirna tha, export quality sorkarin a duh avangin Education Reforms Commission hial a din thu sawiin, Commission rawtna chu tha hle mahse a taka hmang tur chuan sum cheng vaibelchhe 700 vel a ngaih vangin duh angin a kalpui theih loh a ni a ti a. An rawtna te chuan sorkar a tih bengvar phah hle a ni tiin, a theihna chin chinah kalpui mek a ni a ti.

Chief Minister chuan Mizo tawng kan hman danah kan ti rethei ta lutuk chu ngaihmawhawm a tih thu sawiin, zirtirtute kaltlanga siam that hna kalpui a tul a ni a ti a. Faina lam leh zuk leh hmuamin kan hriselna a khawih chhiat theihzia hi uar taka zirlai naupangte hnenah zirtir thin turin zirtirtute chu a chah a. Ringtu kan nihna hi hmang tangkai hle turin a chah bawk a ni.

Khualzahawm Pu H.Rohluna, Minister for School Education chuan zirtirtu contract a thawkte tan 20% quota regularised theih anih thu sawiin, chutiang ang chuan post 81 chauh tih ngheh theih a ni a, mahse cabinet remtihna in 116 post regularised a ni a ti a. Sorkarin kumtin cheng nuai 300 a sen belh a tul tur thu a sawi bawk.

HISSLAM hian Chief Minister hnenah Chief Minister Relief Fund atan Rs. 1 lakh an pe bawk a ni.