Chief Manager, Lead Bank Office, Lunglei Pu James LH Pachuau hmalaknain vawiin khan I&PR Conference Hall, Bazar Veng-ah MJA Lunglei member-te tan ‘Town Hall Meeting-cum-Financial Literacy Campaign’ neih a ni a; Lunglei khawchhunga Bank hrang hrang - SBI, APEX, HDFC leh NABARD - aiawh bank officials te an tel a. He hun hmanpui tur leh Bank Schemes kalpui lai mek chungchanga hrilhhriatna hun hmang turin Aizawl atangin , Dy. Manager(Alternate Channels), Regional Office, SBI Aizawl a rawn kal bawk.

Vawiina Meeting DIPRO Lunglei Pi Mina Zoliani kaihhruaiah hian Bank officials ten sorkar laipuiin Bank kaltlanga Schemes a kalpui mekte leh an Bank theuh hnuaia an hmalakdan te an sawifiah a, MJA member zawhnate an chhang nghal bawk a. Lead Bank Chief Manager Pu James L.H. Pachuau chuan Note lem finfiah dan te hrilhfiahin, India rama Banking System pumpui kalhmang a sawifiah bawk a ni.

Dy. Manager(Alternate Channels), Regional Office, SBI Aizawl Pu Lalhlimpuia chuan tun thla September atangin thla tina Inrinni vawi 2-na leh vawi 4-na (2nd & 4th Saturday) chu Bank zawng zawng tan chawlh a ni tawh dawn a, Inrinni dangte erawh ni chanve chawlh ni tawh lovin ‘full working day’ a ni tawh thung ang tih a puang a. Tun hnaia social media thenkhatah thu dik tawk lo thehdarh thin a nih chu pawi a tih thu a sawi a, Bank hmalakna leh kalphung chungchangah hriatthiam tawk lohna an neih chuan Bank Officers emaw Bank hnathawkte hnenah zawtfiah phawt turin mipuite a chah a ni.