LAD Department buatsaihin vawiin khan Lunglei District huamchhunga Village Council-te tan ‘Training on Village Council and TFC Grant’ chu Saikuti Hall-ah neih a ni a, HPC Lunglei Vice Chairman Pu S.Laldingliana chua Khuallian niin Training hi a hawng.

Training hawnna inkhawm DLAO, Lunglei Pu Lalchawimawia kaihruaiah Khuallian Pu S.Laldingliana chuan India ram chu mipui rorelna ram (democracy) a nih avang leh India Danpui-in ram inrelbawlnaah thuneihna insemzai tur a tih angin, Mizoram-ah pawh Municipal Council leh Village Council te an awm a ni, a ti a. Vawiina VC member kalkhawmte hi mipui thlan ‘elected leader’ an ni hi an ropuina a ni a, he dinhmun pawimawh tak hi hmang thiam a, dik tak leh fel taka rorel turin VC member kalkhawmte a chah a ni. Tunlai khawvelah chuan RTI hmanga lepse theih kan ni a, chuvangin dik tak leh fel taka ro kan rel a ngai tawh a; Pathianin kan kutah thuneihna min pek hi mirethei, chanhai leh hmeithaite chawikan nan hmang tangkai theuh ang u, a ti bawk. A sawi zelnaah 13th Finance Commission atangin cheng vaibelchhe 237 chuang VC-te hman tur sanction a ni a, VC-te account-ah pawisa a lo luang lut leh dawn a, chung sum te chu dik tak leh fel taka hmang a, khawtlang tihhmasawn nan leh mirethei leh pachhiate khaichhuah nan hman tum theuh turin a chah a ni.

Vawiina VC Training-ah hian Pu F.Thansiam, Asst. Director (Audit), Account & Treasuries in 'Maintainance of Account' chungchang a sawifiah a; Pu Lalchawimawia, DLAO, Lunglei in 'VC Act, RGPSA, Asset Register & Mapping, Gram Sabha etc.' chungchang a hrilhfiah bawk.