Vawiin khan Mizoram Land Acquisition Act Drafting Committee chu an Chairman Pu R.Romawia, Revenue Minister hoin Revenue Directorate Conference Hall-ah an thu khawm a.

Chairman Pu R. Romawia chuan Mizoram a kan ram neih dan, kan eizawnna leh kan khawtlang nunphung khawihbuai lo thei ang ber tura sorkarin vantlang hamthatna leh hmasawnna atana mimal ram sorkarin a lak theih dan tur ngaihtuah chunga he Dan hi duan a nih thu a sawi a. Minister chuan kut hnathawk a eizawng leh thingtlang mite hmasawnna leh changkanna ngaihtuah chunga ram lak a nih theih dan tur ngaihpawimawh a nih thu sawiin industry, kawlphetha, inkalpawhna tha zawk, eizawnna ngelnghet leh chhungtinin chenna tur in hmun an neih theih nan he Dan thar duan hi Mizo mipui zawng zawng ten hmasawnna thlentu a nih ngei a beisei thu a sawi.

He meeting-ah hian member te an kal tha hle a. He Drafting Committee hian Dan thar tur an duan chu zo fel thawkhat tawhin Assembly a put luh theih tura peih thuai an tum a ni.