Vawiin chawhnu khan Chief Minister Pu Zoramthanga chuan CM Conference Hall-ah HIV/AIDS Sensitization Campaign Program a hawng. He campaign hi Aizawl District AIDS Prevention and Control Committee in meeting ah Aizawl khawpui chhunga Sorkar Office hrang hrang ah HIV/AIDS sensitization campaign neih nise tia a lo rel tawh bawhzuina a ni a. Chief Minister Secretariat atangin campaign hi bul tan a ni.

Chief Minister Pu Zoramthanga chuan HIV/AIDS a Mizoram dinhmun chu thil ngaihthah chi loh, beihpui thlaka kan do ngai a nih thu a sawi a. Mizoramin India ram pum huap a dinhmun duhawmlo tak - mihring cheng zat atanga chhut a HIV hrik pai tam berna dinhmun a luahna atanga hma kan sawn theih nan he natna hlauhawmzia te, a hrik pai zat kan tam tawh zia te leh inven theih dan kawngte bakah natna vei tawhte enkawl theih dan kawngte kan inhrilhhriat thar leh a tul a ni, a ti a. HIV leh AIDS chungchanga thahnemngai taka DAPCU kaltlanga sawrkar office hrang hranga inhrilhhriatna kalpui a ni tur chu lawmawm a tih thu a sawi. Pu Zoramthanga chuan HIV/AIDS chu dam hlen theihna tur enkawlna la hmuhchhuah a nih loh avangin leh a natna hian kum upa emaw naupang emaw a thliar silo avangin a pawimawh hmasa ber chu fihlim tura nun uluk a, nunphung thlak ngai lai te thlak a ni a ti a. AIDS laka kan fihlim theih nan a sawrkar leh pawl hrang hrangte leh medical mithiamte hmalaknate chu mipuiin kan ngaihven a, a la veilo ten fimkhur kan zir a, a vei tawhte pawhin enkawlna tha zawk kan dawn theih nan a tul a ni, a ti.

He inkhawm hi Aizawl DC Pu Vanlalngaihsaka, District AIDS Prevention and Control Committee Chairman chuan kaihruaiin, Pu John L.T. Sanga, Addl. DC, Aizawl pawhin thu a sawi a. MSACS Project Director Dr. Lalthlengliani chuan Powerpoint presentation hmangin India leh Mizorama HIV/AIDS dinhmun leh MSACS hnathawh dan chungchang a sawi a. District AIDS Prevention and Control Unit (DAPCU) District Programme Manager Dr. R. Zonunmawii chuan Aizawl District a HIV/AIDS dinhmun chipchiar zawka hrilhhriatna kalkhawmte hnenah neiin, programme chhimtu Chief Minister Office Staff-te nen sawihona hun hman nghal a ni a. Kohhran, sorkar department hrang hrang leh mimal ang pawh a HIV /AIDS dona kawngah thei tawp chhuaha thawhho a tul zia te, he natna hi kan ram tan Natna hlauhawm leh tihbaiawm ber a nih thuai tur thu te sawi ho a ni.

HIV/AIDS Sensitization campaign program hi Aizawl khawpui chhunga sorkar office zawng zawng ah neih tum a ni a, a thawh khat nan office thlanchhuah 10 ah program neih hmasak a ni ang a, chumi hnu ah office dang ah chhunzawm leh turin hma lak mek a ni.

MSACS report atanga a landan in Mizorama AIDS vei hriat tirh a ni atanga vawiin thlenga AIDS vanga thi chu 2000 bawr vel nia hriat a ni a. India ram pum a HIV hrik pai zat chuan tlem lam a pan hret hret laiin Mizoram chuam kum tin pung zelin, 2017 a National AIDS Control Organization (NACO) zirchianna ah chuan India ram pumah mi 100 zelah HIV hrik pai zat 0.22% a nih laiin Mizoramah chuan 2.04% a ni a. Mizoram hi India state dangte nen khaikhin in a sang fal hle a, Mizoram dawtah Manipur (1.43%) leh Nagaland (1.15%) an awm a. Heng state te hi Mizoram ang lovin kum tin hniam lam pan zel thung a ni. Aizawlah nitin HIV hrik pai mi 7 hmuhchhuah thar belh zel ang a nih thu te vawiin hian tarlan a ni.