Vawiin khan Chief Minister Pu Lal Thanhawla, Mizoram Boxing Association, Patron ni bawk chuan Hmarchhak huap, thla khat awh tur 1st North East India Boxing Coaching Camp hawnna programme chu Synod Conference Hall ah khuallian niin a hmanpui a, he programme hi Pu Pu Asit Banerjee, Chairman, Co-ordination Board, Boxing Federation of India pawhin khualzahawm niin a hman pui a, Pu Hmingdailova Khiangte, Parliamentary Secretary pawh he programme ah hian a tel bawk a ni. 

Chief Minister Pu Lal Thanhawla chuan Boxing hi India ah hian ngaihpawimawh hlawh em em lo mahse khawvel inelna huapah pawh medal la an awm te hian boxing an ti lar chho mek a, Vijender Singh, Shiva Thapa, Dingko Singh, Mary Kom, Jenny Lalramliani leh chatuan ram pan ta Zoramthanga ten hlawhtlinna an hmu tih a sawi a. Hmarchhak in contact sports hrang hranga theihna (potential) a neih that thu sawiin hengah te hian talent kan nei tha a, training leh coaching a tam thei ang ber buatsaih a tul tih a sawi a. Mizoram District zawng zawnga Boxing Hall leh Boxing ring te dah a nih tawh thu sawiin Sawrkar chuan sports discipline hrang hrang tih hmasawn nan infrastructure lamah nasa takin tan la in, infiamna hmun hma tha tak tak a din a, hengte hi infiam miten tangkai takin an hmang mek a ni a ti a. Sipai team ah Mizo boxers ten hming an chher mek thu sawiin football ah pawh hian nasa takin hlawhtlinna kan hmu chho mek hi a lawmawm tiin a sawi bawk. 

Chief Minister chuan a hmasa ber atan Hmarchhak state hrang hrang huapa boxing coaching camp buatsaih a ni chu lawmawm tiin he camp buatsaihtu Mizoram Boxing Association leh an mahni tanpuitu Boxing Federation of India hruaitute chungah lawmthu a sawi a. Inzirna leh mahni skill tihpun nan coaching leh coach te chu an pawimawh chungin boxer te chungah hlawhtlinna thui tak a innghat  tih a sawi a. Coaching camp a tel Boxer te chu an zirtirtu coach te zah thiama, an thu awiha, an mahni in thunun a, kawng hrang hranga insum turin leh taihmakna leh tumruhna nen boxing a theihtawp chhuah turin a fuih a. Coaching camp hi a thlengtu Mizoram team te pawhin a tangkai thei ang bera chhawr turin a fuih bawk a ni. 

India ramah sports inrelbawlna chungchang sawiin khawvel huapa inelnaah infiam mite thlan naah inthliarna leh induhsakna a awm thin hi a pawi hle a, hei hi a reh hma leh a thiam ber berte chauh thlan an nih loh chuan khawvel huapa India hian hlawhtlinna kan chang sang lovang tih a hlauhthawn thu a sawi a. Hei hi Indian Olympic Association ah amah a inhman laiin a taka a tawn ngei thu a sawi bawk a ni. 

Programme ah hian Chief Minister hian MIZBA Competition Rules a bua buatsaih a tlangzarh a ni. 

Coaching Camp hawnna programme hi President, Mizoram Boxing Association, Dr. Zoramthanga chuan kaihruaiin Secretary General, Mizoram Boxing Association, Dr. Lalrozama, IAS hnen atangin report ngaihthlak a ni a. Programme ah hian Zoramthanga (Late) chhungte leh Jenny R. Lalremliani te hnenah thilpek hlan a ni. Hawnna programme ah hian Mizorama sports association hrang hrang hruaitute leh aiawh te an tel bawk a ni. 

1st North East India Boxing Coaching Camp hi NEC tanpuina sum atanga buatsaih niin MIZBA hian a tul zawng zawng an buaipui a, technical assistance hi Boxing Federation of India in an rawn tum bawk a. Camp hi July ni 18 thleng awh turin niin Hmarchhak state 8 atangin boxer 50 chuang an tel dawn a. Coaching hi Mizoram Boxing Hall Ramhlun Sports Complex ah buatsaih a ni dawn a ni.