March ni 11, 2013-a hawn, kar khat chhung awh, NLUP Implementing Board, Soil & Water Conservation Department leh Hnam Chhantu pawl tangkawpa buatsaih ‘Hmunphiah Kut’ chu vawiin chawhnu khan Mizoram Chief Minister Pu Lal Thanhawla’n a khar.

Hmunphiah Kut kharna inkhawm Vanapa Hall kawta neihah Khuallian Pu Lal Thanhawla chuan kuthnathawktute chu midang pur lova mahni kutkawih ngeia eizawng an nih avangin Pathian thu awih an ni, a ti. Kuthnathawktute tel lovin khawvela mi hausa ber ber te pawh engmah an ni thei lova, chuvangin kuthnathawka eizawng te hi mi zahawm leh chawimawi tlak an ni, a ti bawk. Hmunphiah Kut chhungin Hnam Chhantu Pawl-in hmunphiah siam dan mi 150 vel hnenah training an pek chu lawmawm a tih thu sawiin Chief Minister chuan training zo te zingah a tam zawk thalai an ni tih a hmuhin Mizo thalaite chu taimakna an la tlachham lo hle a ni tih a hriat a ni, a ti. Mizoram tan kuthnathawktute chu mi pawimawh ber an ni tih hria a, vawiina training zo te pawh thahnemngai taka thawk turin a fuih a. Hnam zahawm leh ropui ni tur chuan mahni intodelh a ngai a, intodelh tur chuan taimak a ngai bawk a, taima tur chuan hriselna tha a pawimawh em avangin Mizote chu hriselna lamah tun aia kan inuluk leh fimkhur a tul thu a sawi bawk. Khuallian hian hmunphiah siam training-te hnenah Certificate a hlan nghal a ni.

Vawiin Hmunphiah Kut 2013 kharna inkhawm hi Hnam Chhantu Pawl Vice-President Pu C.Lalthakima’n a kaihruai a. Hmunphiah chungchanga an hmalakna chu Hnam Chhantu Pawl Gen. Secretary Pu R. Romawia’n a sawi a. Kumin hi Hnam Chhantu Pawl din kum 19-na a ni a, hemi pual hian vawiin khan Chief Minister’s Relief Fund atan Rs.30,000/- an pawl Sr. Executive Member Pu Lalzamlova’n Pu Lal Thanhawla hnenah a hlan nghal a ni.

Hmunphiah Kutpui kharna hunah hian Chief Minister nupui Pi Lal Riliani, NLUP Implementing Board Vice-Chairman Pu P.L. Thanga, Industries Principal Secretary Pu P.C. Lawmsanga leh sorkar official pawimawh engemawzat an tel a ni.