Mizoram Budget Session neih meka Pu Lalduhawma,MLA in Vaivakawn leh Mizoram University (MZU) inkar kawngpui siam mek chungchanga adjournment motion a putluh bawhzuiin, vawiin chawhnu khan Chief Minister Pu Lal Thanhawla chuan a hmunah kalin chipchiar takin a en.

Vaivakawn leh MZU inkar kawng chei that nan hian Central sorkar, Ministry of Urban Development hnuaia Jawaharlal Nehru National Urban Renewal Mission (JNNURM) atangin Rs 1907.64 lakhs sanction a ni a, first installment a Rs.429.22 lakhs release tawhin state share Rs.132.74 lakhs hmuh tawh a ni. He kawngpui hi 8.0m a zau tur a ni a, hemi tlin lohna laite chu laih zauh tur a ni a, blacktop chin hi 5.0m a zau tur a ni.Kawng laih zauh hna hi G.P.Projects, Club Road, Silcharin thawkin ni 20.11.2012 khan hna thawh tan a ni a, a hna thawhna tur hi Rs 1.57 Crores niin, tun thla March 2013 chhunga zawh hman tura beisei a ni a, tunah hian 3.66 Km a thui laih zauh turah 2.90Km zawh tawh a ni. Kawngpui (pavement) siam hna hi Sunshine Overseas Pvt Ltd, Tuikhuahtlang hnenah pek a ni a, work order amount hi Rs.10.04 Crores a ni a, ni 13.1.2013 khan hna thawk tanin, kum khat chhunga zo tura tih a ni a, kawng chhah zawng tur hi 255 mm a ni. Kawngpui blacktopping hi 0.50 Km vel zawh tawh a ni a, culvert 4 zawh tawh a ni bawk.

He kawngpui siam mek entu Chief Minister leh a tawiawmtu te hi an kal lamin Zotlang Local Councilin an huam chhungah lo dawngsawngin, kawng laih zauh avanga harsatna tawkte hnena zangnadawmna ngaihtuahsak turin an lo thlen a.Vaivakawn - Ropaia Bawk kawng zawhin, hemi kawnga leimin duhna hmun, a kawipui helna turin lei (bridge) dawh mai tha a a rin thu Chief Ministerchuan sawiin, hemi kawng hi University pan nan pawh a that zawk a rin thu helai hmun an thlir hian a sawi a ni.

Chief Minister leh a tawiawmtute hi University Guest House ah thingpui te inin, hun reilote hman a ni a. Chief Minister chuan Pu Lalduhawma, MLA thahnemngaihna avanga kawng siam mek chu a hmuna en an nih thu a sawi a. Kawng chhia kan ti a, kan phun a; a chhia anih chuan kan siam tha mai tur ani a ti. Chief Minister chuan Tanhrilah MLA Fund atang mai nilo, pangngai taka MUP Building sak sak leh Power Grid Corporation of India Main Gate leh Kawnzau inkar motor kawng siam anih tur thu Tanhril Joint Action Committee a hrilh bawk a. Sihhmui atanga University kaltlanga kawngpui siam tum anih thu pawh a sawi a ni.

MZU Vice Chancellor Pu R.Lalthantluanga chuan University panna kawng siam mekah Chief Minister Pu Lal Thanhawla chungah lawmthu a sawi a. Sihhmui leh University inkar kawngpui siam turah University paltlang lo a siam dan awm thei se a duhthu a sawi bawk a ni.

Chief Minister tawiawmtu Pu Lalduhawma, MLA chuan sorkar ti chak tura local councilte nen tanhona an lak thu a sawi bawk. Chief Minister hi Minister 3, Parliamentary Secretary 3, MLA 1, Principal Secretary to GOM 2, PWD hotu lian te leh UD&PA hotu ten an tawiawm a ni.

Attachment

  • Loading attachment...