Vawiin chawhnu dar 2.00 khan Mizoram State Election Commissioner Pu C. Ropianga office-ah Chakma Autonomous District Council (CADC) General Election neih tur chungchangah meeting pawimawh tak neih a ni a. He meeting-ah hian Pu H. Darzika, Secretary, State Election Commission bakah, SP Lawngtlai te, Election Officer, Lawngtlai te, CADC Secretary te, District Council Affairs leh I&PR Department aiawhte an tel a ni.

State Election Commissiner Pu C. Ropianga chuan CADC inthlanpui neih tur chu tunhma aia changkang zawk leh felfai lehzuala buatsaih tum a nih thu sawiin, mawhphurhna neitute zawng zawng chu kawng engkima ruahmanna felfai a awm theihna atana tan la turin a ngen a. CADC inthlanpui pual bi katana Model Code of Conduct duan chu sawrkara mawhphurhna nei te, party te leh midang tumahin an bawtchhiat lohna tura khauh taka kenkawh a nih tur thu a sawi.

CADC inthlanpui neih hun tur hi State Election Commission chuan a la puang lo a ni. CADC-ah hian polling station 63 a awm dawn a; Kamalanagar-ah chuan polling station 3, voters sangkhat chuang theuh awmna a awm avangin State Election Commission chuan a hun taka vote thlak zawh a nih theihna turin Electronic Voting Machine pakhat aia tam hman a tum a ni. Tin, polling station 7 te chu ramri hung pawn lama an awm avangin ramri hungchhungah District Election Officer, Lawngtlai-in polling station remchang tur a ruahman dawn a ni. Inbiakpawhna te, kalkawng dinhmun te, electric eng tihchangtlun dan tur te, venhimna lam ruahmannate vawiina meeting-ah hian chipchiar taka rel a ni bawk.