Champhai leh a chhehvel khua tlawh tura nimina Aizawl chhuahsan Chief Minister Pu Lal Thanhawla chuan vawiin khan Hnahlan-ah damlo khum 10 awmna Primary Health Centre (PHC) building thar a hawng.

Chief Minister chuan PHC building thar hawn tak chu Hnahlan leh a chhehvel khaw 10 ten an tangkaipui theihna tur chuan a thawktute an pawimawh hle dawn a ni, a ti a. Hriselna hi India sorkar-in a ngaihpawimawh ang bawkin Mizoram sorkar pawhin a ngaipawimawh hle a ni, a ti a. Hrisel loh chuan mi taima tan pawh a taimak theih loh avangin mahni hriselna ngaih pawimawh nachang hria a, ei leh in ah fimkhura min ti chhe theitu lakah kan fihlim a tul a ni, a ti. Mizote hi zuk leh hmuamah kan fihlim loh avangin kan hriselna in a tawrh nasat phah a, cancer vei tam ber kan nite hi a chhuanawm loh takzet a ni, a ti a. Zuk leh hmuama fihlim lote hi drugs ngawlvei ang tho an ni a, kan inbihchian hle a ngai a ni, a ti.

Chief Minister chuan ringtu kan nih angin midangte aia hrisel zawk tur kan ni a ti a. Doctor leh Nurse te chu an hna lama khawvel thiamna chhuak thar zelah intuaihriam a, thiam ve zel (in update) hi kan tum tur a ni, a ti.

Khual zahawm Pu Lalrinliana Sailo, Health Minister chuan sorkar-na an chan tirh atanga siamthat ngai tam tak awmte siamtha chho in leh theihtawp chhuah chunga an kalpui avangin tunah chuan Health Department chu department hlawhtling ber a rawn ni chho thei a ni, a ti a. Tunah hian National Rural Health Mission (NRHM) atan Rs. 31.66 crores lokal leh tur atang hian thingtlanga chengte hriselna nasa taka chawikan tel a beiseiawm thu a sawi bawk a ni.

Hnahlanah PHC hi kum 1981 khan din a lo ni tawh a. Tuna building hawn tak hi Rs. 66,08,102/- senga sak niin kum 2008 September thlaa sa tanin 27th July, 2011 khan sak zawh a ni. A floor area hi 401.44 sq.mt. a ni.

Hawnna inkhawm hi Dr. K. Ropari, Director, Health Service in a kaihruai a, bialtu MLA Pu TT Zothansanga’n lawmthu sawina hun a hmang bawk a ni.

PHC hawn anih hma hian Chief Minister Pu Lal Thanhawla hi Hnahlan khawtlangin ropui takin an lo hmuak a. Amah lawmna vantlang inkhawm Pu Kapchhuanthanga, VCP Hnahlan kaihhruaina Mualveng Community Hall a buatsaihah Pu Lal Thanhawla chuan sorkar hmalakna hrang hrangah Hnahlan mipuiten lawm nachang an hria chu Pathian duhzawng anih avangin malsawmna tam zawk an dawn ngei a beiseipui thu a sawi a. Sorkar duh ber chu kuthnathawktu te, mirethei te, pachhiate leh chhumchhiaten leirem an raha ei leh bar leh sum leh paia an intodelh a, milian leh hausate tlawn ngai lova an awm hi a ni, a ti a. Hemi atana NLUP an kalpui chu a dawngtuten an eiruk emaw dik lo taka an hman a thianglo a ni tiin, rinawmna, taimakna, dikna leh Pathian tihna nung nen an thawh a ngai a ni, a ti. CM chuan sorkar-in hmasawnna hnathawh hrang hranga hmalak power lamah te, kawngpui siam ah te, ramdang nena insumdawn tawnna neihna tura hmalakna te a sawi bawk a ni.