Vawiin chawhma dar 11:00 khan DC Meeting room-ah National Foundation for Teachers Welfare, Serchhip District Chairman leh Deputy Commisioner ni bawk Pi Juhi Mukherjee IAS hovin Serchhip District-a Teachers’ Day 2013 hman dan tur leh NFTW atana sum tuak dan tur te ngaihtuahin an thukhawm.

He meeting-ah hian kumin Teachers Day chu sikul hrang hrang ten chawhma lamah anmahni remchan dan angin mahni sikul theuhah hmang sela, chawhnu lam dar 02:00-ah District huapin DC Conference Hall-ah District Bawrhsap hova hman nise tiin a rel a ni. He hunah hian Serchhip Town chhunga sikul tin atangin zirtirtu pahnih theuh kal tur niin PCR High School New Serchhip chu buaipui ngaite buaipui tura ruat an ni a, SSA Girls Hostel Chhingchhip naupangte pawh Special Item nei tura beisei an ni bawk. Sikul hrang hrangten Teachers Day an hmannaah hian zirlai a duh apiangin an zirtirtute chungchanga an ngaih dan leh an zirtirtute an hmuh dan an ziah theihna tur Chart paper siam ni sela, hengte hi a thla lain DEO-ah thehluh leh vek tur niin, a titha te tan lawmman siam tur a ni ang. Tin, September 4, 2013 zanah Deputy Commissioner-in Television kaltlangin ‘Teachers Day Thuchah’ a sawi bawk ang.

Teachers Day-ah hian naupang ten kawng hrang hrangin an zirtirtute an duhsakna an lantir thin a, he thil hi a lawmawm viau rualin zirtirtute’n naupangte duhsakna thilpek an dawn inbuk tawk lo thin hian boruak tha lo a siam chhuah theih avang leh naupangte tan nu leh pate phurrit siamsakna a nih theih avangin meeting chuan zirtirtute chu naupangten anmahni kutkawih ngeia an siam ‘Card’ chauh lo chu dawng lo turin a ngen a, tin District chhunga Sub Division-te chu khawpui hmun remchang laiah ‘Teachers Day’ Banner tar turin a ruat bawk.

Kumin hian Serchhip District chu National Foundation for Teachers Welfare Fund atan Rs. 1,10,000/- tlin tura beisei a ni a, hemi atan hian Teachers Day Pen Rs. 10 man sing khat leh leh Key Chain Rs. 10 man tho sang khat zawrh tur a awm a. Hengte hi zirna in hrang hranga zawrh turin DEO chuan a semdarh dawn a ni. NFTW sumte hi zirtirtu sawrkar sikul a mi chauh lo pawh, natna khirhkhan leh harsatna tawkte tanpuina tur a nih avangin thahnem ngai taka leisak turin DEO chuan zirna in zawng zawng, private sikul te pawh huamin a ngen a, Serchhip District chhungah kum 2012 chhung khan mi 2 in he tanpuina sum hi an dawn thu a sawi bawk.