2588/2026-2027

Dated Aizawl, the 8th October, 2026: Chief Minister Pu Lalduhoma chuan vawiin khan Secretariat Conference Hall-I ah Mizorama thawk, hnam dang All India Service Officer-te'n Mizo tawng, nunphung leh hnam ziarang an hriatchian zawk theihna tura buatsaih - " Training on Mizo Culture, Language, Society and Value System " chu a hawng a, mipuite tana rawngbawl tur chuan an hnam ziarang hriatchian chu thil pawimawh hmasa ber a nih thu a sawi.

Chief Minister chuan hetiang training programme hi Mizoram-ah a awm vawi khatna a nih thu sawiin a ngaihtuah chhuaktute leh Administrative Training Institute-a thawktute chu fakawm a tih thu a sawi a. Ram inrelbawlna (administration) tha leh hlawhtling nei tur chuan dan leh dun zam a, policy duan ringawt a nih loh thu sawiin sawrkar policy-ah mipuite an inhnamhnawih a, neitu nihna rilru an put tel a tul a ni a ti a. Chumi tur chuan mipuite nena inrintawnna leh inpawhna tha siam a tul thu sawiin an harsatna te ngaithla a, hretthiam tur chuan an tawng, an nunphung leh an hnam hriatchian chu thil pawimawh hmasa berte zinga mi a nih thu a sawi a ni.

Chief Minister chuan Mizote chu hnam inpawh tak mai kan nih thu sawiin tlawmngaihna chu min phurkhawmtu pawimawh tak pakhat a nih thu a sawi a. Mipuite nena inpawhna kawng awlsam ber chu an tawng thiam a nih thu sawiin All India Service officer-te chu an theih chin chinah Mizo tawng thiam tum turin a chah a. Hemi tur atan hian tunlai thiamna chi hrang hrang hmang tangkai thiam turin a chah bawk. AlS officer-te chu hnam hrang hrang, tawng leh mize hrang hrang awmna, India ram ropui tak mai phuarkhawmtu pawimawh tak an nihna inhria a, an awmna hmun apiangah an mipui rawngbawlsakte hnam ziarang hriatthiam tum hmasa phawt zel turin a chah a. He training programme hian hriatthiamna thar nen, Mizo mipuite tan an rawngbawlna kawngah a puih ngei a beisei thu a sawi a ni.

Chief Secretary, Pu Khili Ram Meena chuan non-Mizo All India Service officer-ten Mizo mipuite nena inpawhna tha zawk an neih theihna tur atana he training programme hi ruahman an nih thu a sawi a. Grassroot level Administration kenkawhna atana training pawimawh tak ni a an hriat thu sawiin Mizo society-a NGO leh kohhran pawimawhnate, an inrebawlna a nghawng dante leh Mizo society-a hriattur pawimawh hrang hrangte he training kaltlang hian an zirchhuah ngei a beisei thu a sawi a ni.

Training hawnna program-ah hian Pu Vivek Kumar Tripathi, Link Scretary, DP&AR chuan kalkhawmte lawmna thu sawiin Pu Shudhir Kumar, Principal Secretary, GAD chuan he training buatsaih chhoh a nih dan te a sawi a. Pi Rita Lalnunmawii Pachuau, Director, ATI chuan lawmthu sawiin hun a khar a ni.

Training hi ni sawm leh pali (14) awh tur niin ni khatah darkar khat zel training hun hi neih a ni ang a. October ni 8 atanga October ni 28 thleng neih tur niin All India Service officer (Indian Administrative Service, Indian Police Service leh Indian Forest Service) sawmli leh pakhat (41) tel tura ruahman a ni a, heng zinga sawm leh pakua (19) te chu District-a awm an nih avangin Online-in an attend beisei a ni.