2588/2026-2027

Aizawl, the 8th October, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Mizoram Information Commission (MIC) buatsaih Right to Information (RTI) Week, 2026 lawmna Assembly Annexe Conference Hall, Aizawla neih chu Khuallian niin a hmanpui.

Larsap General (Dr) Vijay Kumar Singh chuan Right to Information chu langtlang, mawhphurhna la ngam leh mipui tel vena sawrkar din nana pawimawh tak a nih thu sawiin, RTI Act, 2005 chuan khua leh tuiten hriat duh an neihte zawh fiah theihna a siam sak bakah sawrkar kalhmang an hriat thuk theih nante a pui a. Heng bakah hian thuneitute chu mawhphurhna nei an ni tih hriat tirin, mipui leh sawrkar inlaichinna a ti chak a ni a ti. Village Council leh Local Council-te thlenga RTI huam tir a ni chu lawmawm tiin, hei hi mawhphurhna la ngam siam kawnga rahbi pawimawh niin, sawrkar office-ah chauh lo pawh langtlang taka hmalakna a awm tih a entir a ni, a ti bawk.

June 29, 2006 a din Mizoram Information Commission-in RTI Act 2005 kenkawh kawnga theihtawp a chhuah chu fakawm tiin, RTI kaltlanga zawhna, ngenna leh ngaimawh zawng thahnem tak thlen a ni chuan khua leh tuite dikna a pe a ni a ti a. Tunlai thiamna hmang tangkaia RTI kalpui a ni chu tha a tih thu leh October ni 5, 2026 a RTI Online Version 2.0 tlangzarh tak chu tangkai taka hman a nih ngei a beisei thu a sawi a. Section 4, RTI Act hnuaia mipui hriat tur tlangzarh tura tihte chak taka bawhzui a tul thu sawiin, RTI zawhna dawn hnuah chauh zawhnate chhan tur tihna a ni kher lova, a theih chin chinah mipuite tana hriat tulte tar chhuah tur a ni. Thup nei lova langtlang taka hmalak hi rorelnaah kalphung ngheta neih zawk tur a ni a ti. 

Mizoram Larsap chuan RTI Act, 2005 hlawhtlin theih nana RTI hmang thinte thahnemngaihna fakawm a tih thu sawiin, RTI chu midang do leh ep rana chetna hmanrua ang zawnga thlir tur a ni lova. Rorelna khawl leh mipuite thlunzawmtu, inrintawnna leh mipui rawngbawlna thuam chakna, mawhphurhna lak ngamna chawilar nana hman zawk tur a ni a ti a. RTI Week hman chhungin RTI Act chungchang zirtirna, awlsam taka hman theihna leh zawh hmasak kher ngai lova mipui hriat tur chin langtlang taka pholante chu uar lehzuala kalpui nise a duh thu a sawi a. Langtlang sawrkar kalphung ngheta siam a nih theih nante, mawhphurhna la ngam sawrkar siam bakah khua leh tuite pawhin hriat tur pawimawhte an hriata hma an lak zung zung theih nantea tanlak puiah mipuite a sawm a ni.

RTI Week 2026 lawmna hunah hian Dr. Lalzirmawia Chhangte, State Information Commissioner chuan kalkhawmte lawmna thu sawiin, RTI Act chungchang leh hmalak dante a sawi a. RTI tangkai taka hmang thin Pu K. Lalngaizuala, East Lungdar leh Pu Adam Saprinsanga Halliday, Chaltlang te'n sawm an nih angin RTI chungchanga an tawnhriat leh hmasawn ngaihna lai nia an hriatte an sawi a. Pi Lily, Secretary, MIC-in lawmthu sawiin hun hman a khar a ni. 

He hunah hian college zirlaite puala RTI slogan inziahsiak buatsaiha tithate hnenah lawmman sem chhuah a ni. 

Pakhatna: Zonunfela, Department of Education (5th Semester), Government Hrangbana College (Rs 5000 + Certificate) 

Slogan: "In secret, democracy dies. In transparency, democracy thrives. Seek the truth, expose corruption and demand justice through "Right to Information."

Pahnihna: F. Lalthanzuala, Department of Public Administration (1st Semester), Pachhunga University College (Rs 4000 + Certificate). 

Slogan: "Right to Information brings transparency to light, to end corruptions of our nation, we must know our right."

Pathumna: Lalrinnunga, B.Com (5th Semester), Government Aizawl College (Rs 3000 + Certificate).

Slogan: "Piallei khat theuha piang hringmi tan hriat thiang leh thiang lo a awm bik dawn em ni? RTI dan hmanga hriatna hi mitin dikna a ni."